Бош вазир Виктор Орбан Венгрия АҚШ ва Россия етакчилари саммити, яъни Президентлар Дональд Трамп ва Владимир Путин учрашувини Будапештда ўтказишга тайёрлигини таъкидлади. У Трамп эълон қилган музокарага ижтимоий тармоқ орқали муносабат билдираркан, ўз юртини “Тинчлик ороли” деб атади.

– АҚШ ва Россия ўртасида тинчлик саммитига тайёргарлик кўрилмоқда, –деди Бош вазир. – Венгрия бу воқеа учун “Тинчлик ороли” бўлишга тайёр. Президентларнинг режалаштирилган бу учрашуви бутун дунёдаги тинчликсевар инсонлар учун жуда яхши янгилик. Биз кутиб олишга тайёрмиз!

Трамп Путин билан учрашув ҳақида пайшанба куни сўз очди, бироқ ҳали аниқ сана белгиланмаган. Эълон жума куни АҚШ Президентининг Украина раҳбари Владимир Зеленский билан Вашингтондаги учрашувидан бир кун аввал янгради.

Кутилаётган учрашув Трамп ва Путиннинг иккинчи бевосита мулоқоти бўлади. Улар шу йил 15 август куни Аляскада биринчи марта юзма-юз суҳбатлашган. 

Ўша саммитдан сўнг АҚШ ва Россия етакчилари ўртасидаги муносабат бироз совиди. Трамп РФ етакчисини Украинага қарши ҳарбий ҳаракатни тўхтатмаётгани учун кескин танқид қила бошлади. Қолаверса, Вашингтон ва Киев мулоқоти сезиларли даражада яхшилангани ҳам кузатиляпти.

Сиёсатчилар фикрича, икки йирик давлат етакчиларининг навбатдаги учрашуви қандай натижа бериши ҳақида олдиндан бирор нима дейиш мушкул.

<iframe width="650" height="420" src="https://www.youtube.com/embed/T80BB6wfeWo" title="Vengriya Putin va Tramp uchrashuviga tayyorlanyapti" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА