Халқаро олимпия қўмитаси вице-президенти Хуан Антонио Самаранч Будапештга ташрифи чоғида Венгрияни Олимпия ўйинларига мезбонлик қилиш учун номзодини илгари суришга чақирди. Бу ҳақда “insidethegames” сайти хабар тарқатди.

Ахборотда Венгриянинг қачон Олимпиадага даъвогарлик қилиши борасида аниқ фикр айтилмаган. Бу воқеа 2036 йил юз бериши эҳтимолдан йироқ эмас. Зеро, яна 14 йилдан кейин ўтиши керак бўлган энг йирик спорт анжуманини қабул қилиш учун бир қатор мамлакатлар қатори Украина ва Россия ҳам ҳаракат бошлаганди. Ҳозирги сиёсий вазият сабаб бу икки давлат пойгадан чиқиб кетиши ҳақиқатга яқин. Шу маънода, кичик Самаранч (унинг отаси Хуан Антонио Самаранч 1980-2001 йиллари ХОҚ президенти бўлган) Олимпия ўйинлари кун тартибига Венгрия вариантини олиб чиққани бежиз эмасдек, назаримизда.

Ташриф доирасида Самаранч Венгрия Олимпия қўмитаси раҳбари Солт Гюлай, бош котиби Ласло Фабиан ва фахрий президенти Пал Шмитт билан учрашди. 2001 йилдан буён ХОҚ аъзоси бўлган Самаранч журналистлар билан мулоқотда “Венгрияда кўплаб янги спорт иншоотлари қурилаётгани ушбу мамлакат Олимпиадани ўтказиш учун зарур инфратузилмавий салоҳиятга эга эканини англатади,” дея таъкидлаган.

Эслатиб ўтамиз, Венгрия шу пайтгача Париж-2024 ҳамда 2032 йилги Олимпия ўйинларини ўтказишга даъвогарлик қилган. Афсуски, ҳар гал маълум сабабларга кўра, курашдан чиқиб кетган.

Т. Рўзиев, ЎзА