Венесуэлада президентлик сайловида амалдаги президент Николас Мадуронинг ғалабаси эълон қилинганидан кейин мамлакат бўйлаб норозилик намойишлари бошланди. Бу ҳақда “The New York Times” нашри хабар бермоқда.

Хабарда айтилишича, пойтахт Каракасдаги норози аҳоли парламент биноси атрофида тўпланишган, натижада полиция ва ҳарбийлар билан тўқнаш келган.  

Куч ишлатар тузилмалари одамларни тарқатиб юбориш учун кўздан ёш оқизувчи газ қўллаган, шунингдек, қуроллардан ҳавога ўқ узган. Отишмага қарамай, намойишчилар Каракасдаги парламент биноси олдидан силжимаяпти.  

Фалькон штатининг маркази Коро шаҳрида намойишчилар Мадуронинг устози, марҳум президент Уго Чавес тасвири туширилган ҳайкални бузиб ташлашди.  

Каракас ва бошқа йирик шаҳарларда ҳарбийлаштирилган гуруҳлар сайлов натижаларига қарши норозилик билдирган тинч аҳоли вакилларини ушлаб туришга ҳаракат қилмоқда.  

Мухолифат етакчилари ва хорижлик кузатувчилар Венесуэладаги сайлов натижалари тафсилотлари ошкор қилинишини истаяпти. Мамлакат ҳукумати эса мухолифат етакчиси Мария Мачадони «сайлов саботажи бўйича асосий гумондор” деб атаган.  

Николас Мадуро ўз телемурожаатида давлат тўнтаришига уринишнинг олдини олишга ҳаракат қилаётганини таъкидлаган.  

Душанба куни тушдан кейин Венесуела ҳукумати сайловнинг расмий натижаларини танқид қилган Лотин Америкаси мамлакатларининг еттита дипломатик ваколатхоналари вакилларини мамлакатдан чиқариб юборди.  

Ў.Алимов,  

ЎзА