Венесуэла АҚШнинг Кариб денгизидаги ҳарбий фаоллигини “тўғридан-тўғри тажовуз” деб атаб, бу ҳаракат мамлакат нефть ишлаб чиқариши ва глобал энергия бозорига хавф солаётганини билдирди. Президент Николас Мадуро “ОPEC+”га мурожаат-хатида Вашингтондан кузатилаётган босим ҳудуд экспорт имкониятини издан чиқаришга қаратилганини айтиб, ташкилотдан сиёсий-дипломатик кўмак сўради.

Унинг фикрича, Қўшма Штатлар ҳарбий кемалари ва бомбардимон амалиёти халқаро ҳуқуқ бузилиши сифатида минтақадаги барқарорликка путур етказади. Масалан, Венесуэла узра ҳаво маконини ёпиш қарори туфайли халқаро авиа компаниялар рейсларни тўхтатишга мажбур бўлди, минглаб йўловчи чорасиз қолди. Бунга жавобан фуқароларни қайтариш бўйича фавқулодда режа ишга туширилди ва ҳолат “қамал” сифатида баҳоланди.

Мадуро мамлакат ўз энергия ресурсларини ҳимоя қилишда қатъийлигини таъкидлади. Ҳолат нафақат минтақавий сиёсий тарангликни кучайтирмоқда, балки халқаро экспертлар огоҳлантиришича, шундай давом этадиган бўлса, Венесуэла учун янги гуманитар инқироз босқичига, дунё нефть бозорида эса кескин тебранишга сабаб бўлиши мумкин. Шу боис Лотин Америкасидаги  бир неча давлат, жумладан Колумбия зиддият янада чуқурлашмаслиги учун халқаро воситачилик йўлга қўйилишини тавсия қилмоқда.

Мусулмон Зиё, ЎзА