Саудия Арабистонида ўтказилган велошоссе бўйича Осиё чемпионати Ўзбекистон терма жамоаси учун муваффақиятли якунланди. Қитъа биринчилигидан сўнг UCI жаҳон ва Осиё рейтингини янгилади.

Янгиланган рейтингга кўра, Ўзбекистон аёллар терма жамоаси Осиё қитъасида 1169 очко билан биринчи ўринни эгаллади. Халқаро рейтингда эса қизларимиз 22-поғонадан жой олган. Шунингдек, эркаклар терма жамоамиз 930 очко билан қитъамизда иккинчи ўринга кўтарилди. Жаҳон рейтингида эса йигитларимиз икки поғона юқорилаб, 40-ўринга жойлашди.

Қайд этиш жоизки, Осиёнинг 25 дан ортиқ давлатидан 350 нафарга яқин спортчи иштирок этган қитъа чемпионатида Ўзбекистон делегацияси 1 та олтин, 2 та кумуш ва 2 та бронза — жами 5 та медални қўлга киритиб, умумжамоа ҳисобида кучли учликдан жой олди.

Жавоҳир Тошхўжаев,

ЎзА