Ватиканда илгари кузатилмаган шов-шувли суд жараёнига якун ясалди, деб ёзди dw.com. Католик черкови тарихида илк бор кардинал қамоқ жазосига ҳукм қилинди.

16 декабрь куни 75 ёшли кардинал Анжело Беччу беш ярим йил озодликдан маҳрум қилинди. У жиноий келишувда иштирок этиш, товламачилик, мансабни суистеъмол қилиш, ёлғон маълумот бериш, коррупция, пул ювиш, махфий маълумот тарқатишда айбланди. Кардинал ва унинг тўққиз нафар шериги устидан суд жараёни икки йил давом этди.

Айбловнинг бир кўринишида 2014 йил хайрия пули билан инвестиция мақсадида Лондон марказидаги энг баланд бинони сотиб олиш орқали қилинган жиноят акс этган. Аудитор маълумотига кўра, кўчмас мулк харид қилишга йўналтирилган сармоядан кўрилган зарар 89 миллион фунт стерлинг (104 миллион евро атрофида)ни ташкил этган.

Беччу ушбу жиноятга қўл урган пайт Ватикан давлат котибияти раҳбарининг умумий ишлар бўйича ўринбосари, яъни лавозим бўйича учинчи шахс эди.

Сўнгги йилларда Рим папаси Франциск Ватиканнинг молиявий шаффофлигини кучайтириш ҳамда коррупциянинг олдини олишга қаратилган қатор фармонлар чиқарди. 2019 йил аввал Рим прокурори бўлган ва мафияга қарши олиб борган кураши билан танилган Жузеппе Пиннатонни Ватикан трибунали раҳбари қилиб тайинланди. 2021 йил Франциск кардиналларни Ватикан судида суд қилишга рухсат берувчи фармонни эълон қилган.