Алишер Навоий номидагиТошкент давлат ўзбек тили ва адабиёти университетида ўтказилган байрам тадбири дастлаб Ўзбекистон Республикаси мадҳияси ижросидан бошланди.

Тўғрида, ватанпарварликка йўғрилган мадҳия садолари инсон руҳиятига барча сўзлардан кўпроқ таъсирга эга. Шундан сўнг ҳарбийлаштирилган гуруҳ йигит-қизларининг “14-январь - Ватан ҳимоячилари куни”га бағишланган чиқишлари кўпчиликнинг эътиборини тортди.  

Сўзга чиққанлар томонидан Она Ватанни ҳимоя қилиш, билим олиш, камолотга эришиш, қайсидир соҳани ёки дунёвий билимларни мукаммал эгаллаб ҳам шу заминнинг муносиб фарзанди бўлиш мумкинлиги таъкидланди. Бу борада Алишер Навоийнинг қолдирган улкан маънавий мероси, бой ўгитлари ҳам мисол қилиб кўрсатилди. Шу куни айниқса куй-қўшиқларда, миллий рақс ижроларида ватанпарварлик туйғулари уфуриб турди. Саҳнага таклиф этилган таниқли спортчилар ўзларининг жаҳон ареналарда эришган ютуқлари мисолида Ўзбекистон номини дунёга машҳур қилиб ҳам Ватан олдидаги шарафли бурчларини адо қилишганини ва ҳамон шогирдлар чиқариб, мамлатимизни машҳур қилиш борасида чин дилдан хизмат қилиб келаётганликларини руҳланиб гапириб беришди.             

Албатта, Ватан туйғуси, уни севиш тушунчаси аслида инсон қалбига жо бўлиши керак. Зеро, юртга хизмат қилиш учун албатта ҳарбий либос кийиш, ҳарбий ҳаракатларда қатнашиш муҳим эмас. Шундай тинчлик ҳукм сураётган Ўзбекистон заминида ўзимизнинг эзгу амалларимиз билан, юрт равнақига ҳисса қўшишимиз билан ҳам Она Ватан олдидаги бурчимизни бажаришимиз мумкинлиги таъкидлаб ўтилди.  

<iframe width="640" height="420" src="https://www.youtube.com/embed/QM7WiTx5nCc" title="Vatanparvarlik tushunchasi targʼib qilindi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Ойбек Давронов, Улуғбек Тўхтаев (видео), ЎзА