Иккинчи жаҳон уруши қатнашчилари Фарғона вилоятида 8 нафар эди. Ғалаба байрами арафасида улар етти киши бўлиб қолишди.

Тошлоқлик Одилжон ота Зокиров 1923 йилда, бундан 102 йил аввал дунёга келган. 17 ёшида кўнгилли бўлиб Катта Фарғона каналини қазиш ишида қатнашди. Шу ерда ундаги қатъият шаклланди.

– 1939 йили Фарғона канали қурилишида иштирок этдим. 1940 йилда эса ўзлаштириш учун ер беришди. 1942 йил сентябргача ана шу ерга сув олиб келиб экин қилдим. Сентябрнинг 12-куни эса урушга жўнатишди. 3 ой аввал акам кетган эди. Акам билан Пенза деган шаҳарда учрашдик. Мен учун биринчи уруш Львов шаҳридан бошланди. Эрта тонгда самолётлар биз турган жойни пулемётдан ўққа тутди. 14 киши ўлиб, 22 таси ярадор бўлди. 

Харковдан бошланган жанговар йўлда аста-секин Украина, кейин Польша, Чехословакиядаги жангоҳлардан ўтди. Неча бор яраланди, бомбаланган майдонда қолиб кетди, лекин ҳар доим ирода билан яна жангу жадалга қайтди.

– Йўлда эшалонга бомба ташлашди. Локоматив ишдан чиқди. Мен тупроқ остида қолиб кетибман. Айтишларича, чамаси 2,5 соатдан кейин ҳушимга кела бошлабман. Дастлаб қўлим жиззиллаганини сездим. Тери ва суякларим куйган эди. Бироздан сўнг бошимда илиқлик сездим. Чап оёғим ҳам жароҳатланган экан. Ҳамширалар яраларимни боғлашди. Госпиталга боришга кўнмадим, яна урушга кирдим. Кейин Варшава шаҳри, Польша ерларини озод қилдик.

Уруш йиллари кўрсатган жасорати учун Одилжон Зокиров юксак мукофотлар билан тақдирланди.

– Мана бу “Жасорат”, буниси “Шуҳрат”, буниси эса Украинани озод қилганлиги учун, унинг ёнидаги Кёнсбергни озод қилганимиз учун, бешинчиси Иккинчи жаҳон урушида қатнашганим учун, мана буниси эса Германия устидан қозонилган ғалаба учун мен тақдирланган орден ва медаллар, – дейди Одилжон ота фахр билан.

Урушдан ғалаба билан қайтган Одилжон Зокиров деҳқончиликни танлади. Менга энг оғир ерларни беринглар, деди у.

– 40 йиллик умрим дашт ва чўлларда ўтди. Қоратепадан Бўзгача ерларни ўзлаштирдик. Ўзим 3,5 минг гектар ерга пахта экдим. Кейин канал жанубидан 50 гектар ер беришди. Бу ерни ҳам ўзлаштириб, пахтазорга айлантирдим. Шундан кейингина нафақага чиқдим.

Одилжон ота Зокиров бир асрдан зиёд умри давомида ҳалол меҳнат қилди, намунали оила бошлиғи бўлди. Унинг ўн нафар фарзанди бўлган.

– Ҳозир 8 таси ҳаёт, – дейди отахон фарзандларига ишора қилиб. –Каттаси 76, кейингиси 70, икки кам 70, 65, энг кичкинаси эса 58 ёшда. Улардан 44 та невара кўрдим. 140 та чевараларим бор, яна 40 та эвараларим туғилган. Шу йилнинг ўзида эваралар 9 тага кўпайди. 

Одилжон ота бугунги кунга шукроналар айтиб яшайди. Ҳалигача фарзандларига насиҳат қилади. Кечаги кунни унутмайлик, дейди.

– 1927-1933 йиллар жуда оғир бўлган эди. Эсимда оналаримиз бир тишлам нон ва дон учун тилла тақинчоқларини йиғиштириб берганлар.

Иккинчи жаҳон уруши қатнашчиси Одилжон Зокиров давлатимиз, унинг Президентидан кўрсатилаётган ғамхўрлик учун миннатдор ва ҳар доим дуода.

– Ватанимиз тинч, юртимиз обод бўлсин. Халқимиз ҳам иттифоқликда бўлсин, Ўзбекистонга кўз тегмасин. Уруш бўлмасин. Президентимиз соғ- саломат бўлиб, узоқ йиллар халқимизга бошчилик қилсинлар, – дея эзгу ниятлар билдирди отахон. 

<iframe width="650" height="420" src="https://www.youtube.com/embed/M7N05oTNPJw" title="“Vatanimiz tinch, yurtimiz obod bo‘lsin” deydi 102 yoshli Odiljon ota" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов (видео, сурат), ЎзА