Vatan uchun, millat uchun, xalq uchun!

Har insonning hayotiga, birodar – 

Eng avvalo urib turgan qalb kerak!

Yana unga lozimdir uch ifoda:

Vatan kerak, millat kerak, xalq kerak!

Der: “yaxshidan qolar faqat yaxshi nom”,

Topa olsang chin hayotga mos yo‘llar.

Sen yaxshi bo‘l, borliqni sev, vassalom:

Vatan qo‘llar, millat qo‘llar, xalq qo‘llar!

Hatto qultum suv totini bilmaslar

Vatanidan ayro bo‘lgan har inson.

O‘zni tani, o‘zligingni bil dastlab -

Vatan sensan, millat sensan, xalq sensan!

Sen dunyoga uyg‘oq nazar solgin-da,

Qara, qancha g‘alayon-u xavf turar!

Tinchlik uchun bayroqdor bo‘l, ortingda –

Vatan turar, millat turar, xalq turar!

Haqiqat shul – olam bo‘lar guliston,

Har bandaning uyg‘oq bo‘lsa qalb ko‘zi.

To bor ekan – yurak tolmas urishdan –

“Vatan” so‘zi, “millat” so‘zi, “xalq” so‘zi!

Bu so‘zlarni his qilmaslik zo‘r aybdir,

Tuproq – nomus, yigit uchun, mard uchun!

Baxsh etmasang, tanangdagi jon hayfdir –

“Vatan uchun, millat uchun, xalq uchun!”

Orif TO‘XTASH

2025 yil, 15 avgust