Парламент қуйи палатасидаги Халқ демократик партияси фракциясининг йиғилишида «Алкоголь ва тамаки бозорини тартибга солиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун лойиҳаси биринчи ўқишда кўриб чиқилди.

Таъкидланишича, амалда лицензия фаолиятини амалга оширганлик учун йиллик давлат божини тўлаш муддати белгиланмагани сабабли 65 та ишлаб чиқарувчи ва улгуржи савдо субъекти томонидан қарийб 10 миллиард сўм давлат божи тўланмаган. 

Шундан келиб чиқиб, қонунчиликка қатъий меъёрлар таклиф этиляпти. Билдирилган сабаб ва зарурат ҳақидаги фикрлардан келиб чиқиб, фракция аъзолари лойиҳани концептуал жиҳатдан маъқуллади. 

Шунингдек, депутатлар “Валютани тартибга солиш тўғрисида”ги “Ўзбекистон Республикаси Қонунининг 111-моддасига активларни репатриация қилиш талабларини такомиллаштиришга қаратилган ўзгартириш киритиш ҳақида”ги қонун лойиҳасини муҳокама қилди. 

Қайд этилганидек, ушбу қонун лойиҳаси билан ташқи савдо операциялари бўйича белгиланган муддатларда активлар репатриация қилинмагани учун қўлланиладиган жавобгарлик чораларини соддалаштириш орқали такомиллаштиришни назарда тутувчи ўзгартириш киритилмоқда. Қонун лойиҳасининг қабул қилиниши ташқи савдо операцияларини амалга оширишда тадбиркорлик субъектларига қўшимча қулайликлар ҳамда муддати ўтган дебитор қарздорликларни қисқартириш имконини яратади. 

Йиғилишда кун тартибидан ўрин олган бошқа қонун лойиҳалари ҳам атрофлича муҳокама қилиниб, қўллаб-қувватланди. 

Муҳтарама Комилова, ЎзА