Валюта айирбошлаш билан шуғулланиб келган З.Б. жами 3 минг АҚШ доллари ва 44 минг қирғиз сомини фуқаро А.А.га 39,9 миллион сўмга сотган вақтда Бош прокуратура ҳузуридаги Департамент ҳамда ДХХнинг Хўжаобод тумани бўлими ходимлари томонидан ИИБ ходимлари билан ҳамкорликда ўтказилган тезкор тадбирда ушланган. Унинг ёнидан 3 минг 315 АҚШ доллари ҳамда 48,5 минг қирғиз соми ашёвий далил сифатида олинган.

Департаментнинг Чуст тумани бўлими томонидан ўтказилган тезкор тадбирда эса валюта айирбошлаш билан шуғулланиб келган Ж.Б. фуқаро Г.Р.га жами 4 минг 200 АҚШ долларини 48,1 миллион  сўмга сотишга келишиб, шундан 2 минг АҚШ долларини берган вақтида ашёвий далиллар билан ушланган.  

Департаментнинг Андижон шаҳар бўлими томонидан ўтказилган тезкор тадбирда валюта айирбошлаш билан шуғулланиб келган А.К. жами 3 минг 400 АҚШ долларини фуқаро А.Д.га 38,9 миллион сўмга сотган вақтида ашёвий далиллар билан қўлга тушган.  

Департаментнинг Чиноз тумани бўлими томонидан ўтказилган тезкор тадбирда валюта айирбошлаш билан шуғулланиб келган Ж.М. жами 3,3 минг АҚШ долларини фуқаро М.А.га 37,9 миллион  сўмга сотган вақтда ашёвий далиллар билан ушланган.  

Департамент матбуот хизмати хабарига кўра, мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда.  

Н.Абдураимова,  

ЎзА