Сўнгги кунларда Бухоро вилояти божхона бошқармасининг “Бухоро” аэропорти чегара божхона пости орқали валюта қимматликларини ноқонуний тартибда олиб чиқишга бўлган уриниш кўпайган.

Хусусан, мазкур турдаги қонунбузарлик ҳолати “Бухоро-Истамбул” ва “Бухоро-Шереметево” авиарейслари орқали хорижий давлатга чиқиб кетиш арафасида бўлган йўловчилар томонидан содир этилди.  

Унда фуқаролар тегишли божхона назоратидан ўтказилган вақтда белгиланган меъёрдан ортиқча бўлган валюталарни йўловчи божхона декларациясида қайд этмаган ҳолда республикамиз чегарасидан олиб чиқишни мақсад қилган.  

Божхона чегарасидан ҳаракатланиш тартиб-қоидаларидан хабардор бўлмаслик ёки, уларни четлаб ўтишга бўлган ҳаракат натижасида июнь ойи давомида белгиланган меъёрдан ортиқ бўлган валюта маблағларини олиб чиқишга бўлган 4 та уринишда жами 17 600 АҚШ долларини ноқонуний тарзда олиб чиқилишининг олди олинди.  

Маълумот учун, жисмоний шахслар томонидан эквиваленти 100 000 000 (юз миллион) сўмгача бўлган нақд валюта маблағларини ихтиёрий тарзда йўловчи божхона декларациясида кўрсатиб Ўзбекистон Республикасидан олиб чиқишга рухсат этилади. Мазкур меъёрдан ортиқча бўлган пул маблағларини олиб чиқиш учун эса, тегишли рухсатномаларни олиш талаб этилади.  

Зариф Комилов, ЎзА мухбири.