Оман Сұлтандығында тіркелген UzOman инвестициялық компаниясы Өзбекстан аумағында жаңа банк ашу жоспарын жариялады.

Осыған байланысты Өзбекстан Республикасының инвестициялар, өнеркәсіп және сауда министрі Лазиз Қудратов «UzOman» компаниясының бас атқарушы директоры Умар Бахраммен кездесті. Тараптар жаңа жобаны іске асыруға қатысты ұйымдастырушылық мәселелер мен қажетті шарттарды талқылады.

Әңгіме барысында соңғы жылдары Өзбекстан мен Оман арасындағы инвестициялық ынтымақтастықтың тұрақты дамып, өзара байланыстардың қарқынды нығайып келе жатқаны ерекше атап өтілді. Сонымен бірге «UzOman» қатысуымен жүзеге асырылатын өзге жобалар жөнінде де пікір алмасылды.

Кездесуде бірлескен іс-шаралардың тиімділігін арттыру, практикалық бастамалар аясын кеңейту және жаңа жобаларды ілгерілету үшін күш-жігерді үйлестіру қажеттігі айтылды. Қаржылық әріптестіктің болашағына қатысты да ойлар ортаға салынды.

Кездесу соңында тараптар диалогты одан әрі жандандыруға, институционалдық байланыстарды кеңейтуге және серіктестіктің негізгі бағыттары бойынша өзара тиімді ақпарат алмасуды жалғастыруға дайын екенін мәлімдеді.