«Узбекнефтгаз» АҚ мен АҚШ-тың ірі мұнайсервис компанияларының бірі – «Halliburton» өкілдері арасында жұмыс кездесуі өтті.

Кездесу барысында тараптар мұнай мен газ кен орындарына заманауи технологияларды енгізу және өндіру тиімділігін арттыру мәселелерін талқылады.

Айта кету керек, «Halliburton» компаниясы АҚШ-тың Техас штаты, Хьюстон қаласында орналасқан және әлемдегі ең ірі мұнайсервис корпорацияларының қатарына кіреді. Компания көмірсутек шикізатын барлау, бұрғылау және өндіру, сондай-ақ кен орындарын игеру тиімділігін арттыру бойынша озық технологияларды ұсынады.

Келіссөздер барысында негізгі назар Өзбекстанда газ кен орындарын барлау және өндіру процесінде жаңа технологияларды енгізу мәселесіне аударылды. Атап айтқанда, сейсмикалық барлау, геологиялық-геофизикалық талдау және сандық модельдеу әдістерін қолдану мүмкіндіктері қарастырылды.

Сонымен қатар, игеру қиын қорларды өндіру, ұңғымаларды бұрғылау және аяқтау технологияларын жетілдіру бағытында ынтымақтастықты кеңейту мәселелері талқыланды. Бұл тәсіл Өзбекстанда көмірсутек ресурстарын тиімдірек пайдалануға мүмкіндік береді.

Кездесу барысында «Halliburton» компаниясы өз технологияларын Өзбекстанда жергіліктендіру перспективаларын қарастырды. Сондай-ақ, мұнай-газ саласы үшін мамандар даярлау, оқу бағдарламаларын әзірлеу және бірлескен жобаларды жүзеге асыру бойынша ұсыныстар айтылды.

«Узбекнефтгаз» АҚ-ның баспасөз қызметінің хабарлауынша, тараптар серіктестіктің басым бағыттарын айқындап, бірлескен жобаларды жүзеге асыру үшін «Жол картасын» әзірлеуге келісті.