2022 йил 4 февраль куни “Uzbekistan GTL” заводида электр энергиясини ишлаб чиқаришни йўлга қўйиш учун биринчи буғ турбинаси генератори ишга туширилди.

Бу ҳақда Энергетика вазирлиги матбуот хизмати маълум қилди.

Умумий қуввати 90 МВтгача бўлган электр энергиясини ишлаб чиқариш қурилмасининг ишга туширилиши билан яқин кунларда "GTL" заводи нафақат ўзининг ишлаши учун зарур бўлган электр энергиясини ишлаб чиқаришни, балки республика миллий электр тармоғига қўшимча  45 МВтгача бўлган ҳажмда электр энергиясини етказиб беришни ҳам бошлайди.

Қўшимча ишлаб чиқариш қувватлар "Шўртан газ-кимё" мажмуаси, Шўртан нефть-газ қазиб чиқариш бошқармаси, шунингдек, бошқа ишлаб чиқариш ва ижтимоий объектлар, жумладан, турар-жой бинолари ва тадбиркорлик субъектларини электр энергияси билан таъминлаш имконини яратади.

"GTL" заводида ишлаб чиқариладиган электр энергиясини автоном ишлаб чиқариш экологик жиҳатдан хавфсиз бўлиб, технологик жараён давомида ҳосил бўладиган ортиқча буғ ҳисобига амалга оширилади. Умуман олганда, GTL заводида қуввати 90 МВтгача бўлган электр энергиясини ишлаб чиқарадиган иккита  буғ турбинали генератор ўрнатилган.  

ЎзА.