“UzAuto Motors” АЖ Chevrolet Captiva 5 автомобилини етказиб бериш бўйича бекор қилинган шартномаларнинг маблағларини қайтаради ва компенсацияни амалга оширади. Бу ҳақда “UzAuto Motors” ахборот хизмати маълум қилди.

“UzAuto Motors” АЖ компанияси 2021 йилнинг 20 ноябрь санасида Chevrolet Captiva 5 автомобилларини етказиб бериш бўйича шартномалар тўхтатилгани ҳақида расмий баёнот бергани ҳақида маълум қилинган эди.

Баёнотда ёзилишича, мижозлар мурожаатидан кейин 3 кун ичида тузилган шартномалар бўйича тўланган барча маблағлар тўлиқ қайтарилади. Шунингдек, компания қўшимча равишда олдиндан тўлов суммасининг 5 фоизини компенсация сифатида тақдим этилиши ҳақида маълум қилган эди.

Маълум бўлишича, Chevrolet Captiva 5 автомобили бўйича жами 461 та шартнома пули тўланган. Aйни пайтда 207 нафар харидор Chevrolet Captiva 5 автомобили ўрнига бошқа автомобилни олишга қарор қилишган бўлса, 161 нафари эса тўланган маблағни қайтарилиши учун ариза билан мурожаат қилган ва аллақачон пулларини қайтариб олишган. Улардан 41 нафар мижоз кечаги кундан бошлаб компенсация сифатида тақдим этилган 5 фоизлик тўлов суммасини олишган.

Қолган харидорлар ҳам ўз маблағлари ва компенсацияни яқин икки-уч кун ичида олишади.

Шаҳноза Маматуропова, ЎзА