Қорақалпоғистон Республикаси Амударё туманининг олис ва чекка ҳудудларидан бири — Уйшин маҳалласида янги ташкил этилган оилавий шифокорлик пункти фаолияти йўлга қўйилди. Мазкур тиббиёт масканида аҳолига сифатли тиббий хизмат кўрсатиш учун барча зарур шарт-шароитлар яратилган.

Янги тиббиёт пункти маҳалла аҳли ҳаётида катта қулайлик яратди. Чунки аввал ушбу ҳудуд аҳолиси Қипчоқ шаҳарчасида жойлашган 1-оилавий поликлиникага мурожаат қилишга мажбур эди. Поликлиника маҳалладан 8–9 чақирим узоқликда жойлашгани, айниқса қишнинг совуқ кунлари ёки ёзнинг жазирама иссиғида транспорт воситасини топишдаги қийинчиликлар кексалар ҳамда ёш болали оилалар учун ноқулайлик туғдирар эди.

Аҳоли эҳтиёжини инобатга олган ҳолда, саховатпеша тадбиркор ташаббуси қўллаб-қувватланиб, Қорақалпоғистон Республикаси Соғлиқни сақлаш вазирлиги томонидан маҳалла ҳудудида янги тиббиёт пункти қуриш лойиҳаси тасдиқланди. Эътиборлиси, ушбу иншоот тадбиркор ҳомийлигида барпо этилди. Бу эса хусусий секторнинг ижтимоий соҳадаги фаол иштирокининг ёрқин намунаси ҳисобланади.

[gallery-27464]

Замонавий тиббиёт пунктида иккита тиббий бригада ташкил этилган бўлиб, жами 4 минг 100 нафар аҳолига тиббий хизмат кўрсатиш йўлга қўйилди. Муассаса ультратовуш текшируви, электрокардиограф, тиш даволаш ускуналари, компьютер техникалари каби илғор тиббий жиҳозлар билан тўлиқ таъминланган. Бу тиббиёт инфратузилмасининг янада кенгайиши, аҳоли саломатлигини муҳофаза қилиш ҳамда соғлом турмуш тарзини тарғиб этиш йўлидаги навбатдаги муҳим қадам бўлди.

<iframe width="650" height="420" src="https://www.youtube.com/embed/yydIK-BT0gw" title="Uyshinda zamonaviy oilaviy shifokorlik punkti ish boshladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мақсад ҲАБИБУЛЛАЕВ (сурат ва видео), ЎзА