Коррупция ва порахўрлик давлатни ич-ичидан емиради. Айнан шу иллат сабабли кўплаб давлатларнинг инқирозга юз тутгани ҳам тарихдан маълум.

Мамлакатимизда коррупциянинг ҳар қандай шаклдаги кўринишини йўқотиш борасида тизимли ишлар амалга оширилмоқда.

Хусусан, Уй-жой коммунал хизмат кўрсатиш вазирлиги ҳузуридаги Уй-жой фонди инспекцияси томонидан мамлакатимиздаги қатор уй-жой мулкдорлари ширкати фаолияти ўрганилди.

Натижада 20 та уй-жой мулкдорлари ширкати томонидан 37 та ҳолатда 1,6 млрд. сўм маблағ мақсадсиз сарфлангани ёки талон-торож қилинганлиги аниқланди.

Шундан 8 та ҳолатда қурилиш-таъмирлаш ишлар ҳажмига 451,8 млн. сўм қўшиб ёзилган. 5 та ҳолатда 508,2 млн. сўм кредит маблағи мақсадсиз сарфланган ёки талон-торож қилинган.

Шунингдек, 16 та ҳолатда мулкдорлардан йиғилган 313,2 млн. сўм мажбурий бадал маблағи мақсадсиз ишлатилган ёки талон-торож қилинган.

Қолаверса, 8 та ҳолатда 351,9 млн. сўмга тенг бошқа ҳуқуқбузарлик ва камчиликларга йўл қўйилган.

Ҳолат юзасидан тегишли ҳужжатлар расмийлаштирилиб, ҳуқуқни муҳофаза қилиш органларига тақдим этилди.

Умуман олганда, сўнгги йилларда амалга оширилаётган ишлар таҳлили аҳолининг ҳуқуқий онги ва ҳуқуқий маданиятини оширишга, жамиятда коррупцияга муросасиз муносабатни шакллантиришга йўналтирилган тизимли чоралар кўрилганини кўрсатиб турибди.

Ислоҳотларни амалга ошириш доирасида фуқароларнинг ҳуқуқ ва манфаатларини ҳимоя қилиш, давлат ҳокимияти ва бошқаруви органлари фаолияти очиқлигини англатади.

Тўғри, бажарилган ишлар салмоқли. Аммо биз кечаги қилган ишимизнинг натижасига маҳлиё бўлиб қолсак, эртанги ишимизнинг якуни биз кутганчалик бўлмаслиги табиий.

Шаҳноза Маматуропова, ЎзА