ФОТОРЕПОРТАЖ

Сурхондарёда АҚШ Халқаро тараққиёт агентлиги (USAID) аёллар учун мўлжалланган касбий таълим ва тадбиркорлик соҳасидаги ўқув дастурини бошлади.

Мазкур ташаббус аёлларнинг иқтисодий ҳуқуқ ва имкониятларини кенгайтириш дастури доирасида амалга оширилаётган бўлиб, меҳнат бозорида ўзбекистонлик қишлоқ аёлларини тадбиркор ва малакали ишчи сифатида иштирок этишига кўмаклашади.

[gallery-9268]

Маълумки, Сурхондарё вилоятида азалдан миллий ҳунармандчилик кенг ривожланган. Воҳа қизлари болаликдан гилам тўқиш, кашта, дўппи ва бошқа буюмлар тикиш каби ҳунармандчилик турлари билан шуғулланиб келган. Лекин, замонлар ўзгариши ва глобаллашув жараёнларида опа-сингилларимиз бу анъаналарни йўқотаётган эди. Сўнгги йилларда соҳани кенг йўлга қўйишга миллий қадриятларимизнинг бир бўлаги сифатида қаралаётгани хотин-қизлар бандлигини таъминлаш ва уни қайта тиклашга қулай муҳит яратди. Вилоят хотин-қизларида соҳа сирларини чуқур ўрганиб, оилавий бюджетига қўшимча даромад олиб келишга қизиқиш, интилиш ошди.  

Халқаро тараққиёт агентлиги Термиз шаҳридаги “Алмаз” МЧЖ қошида ташкил этилган Ҳунарманд маркази билан ҳамкорликда 20 нафар кам таъминланган оила хотин-қизларини касб-ҳунар ўргатиш ўқув курсларига жалб қилди.  

Ўқув курсида тингловчилар 2 ой давомида маҳоратли ўқитувчилардан қўлда мато тўқиш ҳамда тўқувчилик сир-асрорларини ўрганади. Ўқишни тугатгандан сўнг, уларга сертификат берилади. Шунингдек, курс битирувчилари истаса, шу ернинг ўзида иш билан таъминланади.  

Жонибек ҚЎЗИМУРОДОВ(сурат),ЎзА