ФОТОРЕПОРТАЖ

Иккинчи жаҳон уруши ҳақидаги хотираларнинг жонли гувоҳлари сафи, афсуски, тобора камайиб бормоқда. Начора, ҳаёт бу! Бугун асрни қаритиб, ўша даҳшатли йилларни ҳамон титраб эслайдиган, айни чоғда ҳозирги тинч, осуда ҳаёт учун шукронани тилидан қўймайдиган нуронийларимизнинг умр йўли авлодлар учун ибрат мактаби бўлиб қолаверади.

Жануби-ғарбий махсус ҳарбий округ қўшинлари қўмондонининг тарбиявий ва мафкуравий ишлар бўйича ўринбосари, полковник Исроил Собиров бошчилигида Сурхондарё вилоят мудофаа ишлар бошқармаси ва бўлимлари ҳарбий хизматчилари, Термиз ҳарбий госпитали ҳамда туман ҳокимликлари вакиллари Қумқўрғон, Шўрчи, Олтинсой ва Денов туманларида умргузаронлик қилаётган Иккинчи жаҳон уруши қатнашчилари хонадонида бўлдилар. Малакали шифокорлар отахонларни тиббий кўрикдан ўтказиб, зарур дори-дармонлар улашди.

Қумқўрғон туманидаги Мунчоқтепа маҳалласида яшаётган Ҳайит бобо Мусаев 19 ёшида урушга йўл олган. Жангларда чинакам жасорат кўрсатган отахон бу йил 1 май куни 100 ёшни қарши олди.
 

[gallery-11784]

Иккинчи жаҳон уруши иштирокчиси хонадонида бўлиб ўтган тадбирда пиру бадавлат отахон меҳмонларга уруш даври ва ундан кейинги машаққатли давр ҳақида сўзлаб берди. 

– Навқирон ёшлигим олис юртларда кечди, – дейди Шўрчи туманида истиқомат қилаётган Оқбой бобо Шоймардонов. – Жанг майдонларида сон-саноқсиз қуролдошларимдан айрилдим. Кўз олдимда дайди ўқдан жон таслим қилаётган сафдошларимни эсласам, ҳамон юрагим оғрийди... Ҳозир эса ҳар тонгда хотиржам уйғонганимга шукр айтиб, бошдан ўтказган у кунларни авлодларимиз ҳеч қачон кўрмасин, дея дуо қилиб ўтирибман.

Иккинчи жаҳон урушида Сурхон воҳасидан фронтга 53 минг 365 ўғлон жўнатилган. Уларнинг 11 нафари жангу жадалларда жасорат намуналарини кўрсатиб, мардларча ҳалок бўлган.

Сурхондарё вилоятида ҳозирги кунда 8 нафар Иккинчи жаҳон уруши қатнашчиси ҳаёт.

Жонибек ҚЎЗИМУРОДОВ (сурат), ЎзА