Urgutda Prezidentdan soʻralgan kutubxona ochildi
Prezidentimiz Shavkat Mirziyoyev oʻtgan yilning 17-18 mart kunlari Samarqand viloyatiga tashrifi chogʻida Urgut tumani vakillari hududda zamonaviy kutubxona tashkil etish taklifini qoʻllab-quvvatlab, amaliy yordam koʻrsatilishini taʼkidlagan edi.
Prezidentimiz Shavkat Mirziyoyev oʻtgan yilning 17-18 mart kunlari Samarqand viloyatiga tashrifi chogʻida Urgut tumani vakillari hududda zamonaviy kutubxona tashkil etish taklifini qoʻllab-quvvatlab, amaliy yordam koʻrsatilishini taʼkidlagan edi.
Shundan soʻng Urgut tumani markazidagi istirohat bogʻida kutubxona qurilishi boshlanib ketdi. Bir yil davomida bu yerda 3 milliard 600 million soʻm mablagʻ sarflanib, ikki qavatli, barcha qulayliklarga ega axborot -resurs markazi binosi qad rostladi. Binoda 20 ga yaqin mutolaa zali, 4 ta muhokama va kompyuter xonalari mavjud. Kutubxona 2000 dan ortiq badiiy, ijtimoiy-siyosiy adabiyotlar bilan taʼminlandi. Shuningdek, maʼrifat maskanida 50 ta zamonaviy kompyuter, tezkor WI-FI tarmogʻi yoʻlga qoʻyilgan boʻlib, 2000 ta adabiyotning elektron nusxasi shakllantirilgan.
Axborot-resurs markazining ochilishi katta tantanaga aylanib ketdi. Viloyat va tuman hokimligi rahbarlari, keng jamoatchilik vakillari, ijodkorlar va oʻquvchi-yoshlar qatnashgan tadbirda yurtimizda aholining kitobxonlik madaniyatini oshirish, yoshlar oʻrtasida kitob mutolaasini keng targʻib etish borasida olib borilayotgan ishlar eʼtirof etildi.
– Prezidentimizning alohida eʼtiborlari bilan bunyod etilgan ushbu ziyo maskani tumanimiz aholisining eng sevimli goʻshalaridan biriga aylanishi shubhasiz, – deydi Oʻzbekiston yozuvchilar uyushmasi aʼzosi Xudoyberdi Komilov. – Sababi, Urgutda kitobsevarlar, ijodga oshno yoshlar koʻp. Ular endi bu yerga kelib, kitobxonlik boʻyicha bahs-munozaralar oʻtkazishlari, ijodkorlar bilan adabiy uchrashuvlar tashkil etishlari mumkin.
Qayd etish lozim, yaqinda Prezidentimiz ilgari surgan besh tashabbusni Urgut tumanida amalga oshirish boʻyicha Samarqand viloyati hokimi E.Turdimov “Yoʻl xaritasi”ni tasdiqladi.
