Тошкент шаҳри Учтепа туманидаги 1-болалар ва ўсмирлар спорт мактабида талабалар ўртасида Универсиада спорт мусобақалари дастуридаги стол тенниси бўйича республика финал босқичи якунланди.

Олий ва ўрта махсус таълим, Жисмоний тарбия ва спорт вазирликлари ҳамда бир қатор ташкилотлар томонидан ўтказилаётган мусобақада мамлакатимизнинг барча ҳудудидан 14 жамоа таркибида 28 спортчи-талаба ғолиблик учун куч синашди.

Мусобақанинг жамоавий баҳсларида Наманган жамоаси биринчи поғонадан жой олган бўлса, самарқандлик талабалар иккинчи бўлди. Фахрли учинчи ўрин эса Андижон ва Жиззах жамоасига насиб этди.

Яккалик баҳсларда Шаҳбоз Баратов (Тошкент вилояти) ва Шабнам Жумаева (Сурхондарё) барча рақибларини енгиб, олтин медални қўлга киритди. Аралаш жуфтликда бухоролик Алишер Эргашев ҳамда тошкентлик Зулайҳо Ёқубова тандеми ғолиб бўлди.

Универсиада спорт мусобақалари ғолиб ва совриндорлари ташкилотчилар томонидан диплом ва эсдалик совғалар билан тақдирланди.

– Мазкур мусобақадаги ҳар бир учрашувга алоҳида тайёргарлик кўрдик. Мураббийларимизнинг кўп йиллик меҳнати ва бизга бўлган ишончи сабаб жамоамиз бош совринни қўлга киритди. Универсиада спорт мусобақалари биз ёшларни улкан ғалабалар сари етаклайди, – деди наманганлик Маҳлиё Омонова.