Ўтган жума куни АҚШ Федерал қидирув бюроси агентлари Трампнинг собиқ маслаҳатчиси Жон Болтоннинг уйида тинтув ўтказди. Бу ҳақда кўплаб ОАВ ёзди. Кўпчилик эшитган воқеани яна эслашдан муддао не? деган саволни беришингиз ўринли. Гап шундаки, Болтон охирги пайт Президентни фаол танқид нишонига олаётганлардан биридир.

Энг қизиғи, ФҚБ ходимлари уйини “ағдар-тўнтар” қилаётган пайт ҳам у ижтимоий тармоқ орқали Трампга қарши гапирди. Балки, бу тасодифдир, аммо баъзилар Жон аввалдан ФҚБ назорати остида бўлган, дейишяпти.

Маълум бўлишича, Болтон “биринчи ҳукмронлик” даврида бир йилдан зиёд хавфсизлик бўйича маслаҳатчи лавозимида Президентнинг ёнида ишлаган. Баъзи манбалар Трамп уни ишдан бўшатгани айтилса, Болтоннинг ўзи истеъфога чиққанини таъкидлаяпти. Ҳар ҳолда, етакчининг феълини билганлар истеъфо вариантига ишонишмаса керак.

АҚШ Президенти ёнида 2018 йил бошидан 2019 йил охирига қадар ишлаган Жон Болтон айнан шу муддат оралиғида Оқ уйда бўлиб ўтган воқеалар асосида “Воқеа содир бўлган хона: Оқ уй хотиралари” номли китобини нашр қилди. Трамп бир вақтлар бу асар чоп этилишини тақиқлашга уринган. Бунинг сабабини собиқ маслаҳатчиси махфий маълумотларни ошкор қилиши мумкинлиги билан изоҳлаган.

ФҚБ директори Кэш Пател томонидан рухсат берилган тинтувга айнан нима сабаблигини ҳеч ким аниқ билмаяпти. Трамп бу ишдан умуман хабари йўқлигини баён қиларкан, шундай деган:

– Болтон нокас, унинг тарафида эмасман! Кўпчилик демократлар фикри ҳам шундай, Жонни ёқтиришмайди. 

Масалан, калифорниялик сенатор Адам Шиффнинг баҳоси қуйидагича:

– Жон Болтоннинг ватанпарварлигига шубҳа қиламан...

Январь ойида Трамп Болтонга нисбатан хавфсизлик мақомини бекор қилди. Махсус ҳимоя унга Эрон ҳукумати томонидан пайдо бўлган жиддий таҳдид туфайли жорий этилганди. Демак, бу шахс Ислом Республикаси ҳукуматига ҳам ёқмаган. Зеро, бир пайтлар Болтон Эронга нисбатан кескин сиёсат олиб бориш ташаббуси билан чиққан ва бу жараёнда Трампни ҳам айблаган. У Президентнинг бугунги кундаги фаолиятидан ҳам норози. Трампни сусткашлик ва жаҳолатда айблаб, ташқи сиёсатда кўп хатога йўл қўйишини таъкидлайди.

Масалан, Аляска учрашувига баҳо бераркан, “Трамп натижасиз қайтди, Путин эса ютуқ билан”, – деди. Табиийки, бундай гап ўзини “дунёда тинчликпарвар сиёсатчи сифатида намоён этмоқчи бўлаётган инсон”га ёқмайди.

Дарвоқе, қўшниси Жеральд Рогелл ҳам The New York Times нашрига берган интервьюсида Жонни “ёқимсиз” шахслигига эътибор қаратган:

– Жон Болтон ҳурматга нолойиқ. У нафақат иши, балки ҳаётидаги ҳар бир воқеага худди детектив каби ёндашади. Бундай одамлар кўпчиликни ёқтирмайди, жамоа билан боғлиқ тантаналарни ёмон кўради. Агар ундан шакар сўраб кирсангиз, шакар солиб берган идиши қайтарилишини кафолатлайдиган, жарима ва бошқа жиҳатлар кўзда тутилган шартнома тузишдан ҳам қайтмайди. 

У яхши қўшни бўлмаслиги мумкин, аммо Трампдек душмани борлигини билиб, ўз ишига жиддий масъулият билан ёндашади, қатъий қоида асосида яшайди.

<iframe width="650" height="420" src="https://www.youtube.com/embed/u265Zq8Hzz0" title="Uni hamma yomon ko‘radi: Tramp ham, qo‘shnisi Jerald amakiyam" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Улуғбек Тўхтаев, ЎзА