Испандық футбол жаттықтырушы Унаи Эмери «Астон Вилла» клубының бас бапкері болып тағайындалды.

Ағылшын Премьер-лигасы командасының ресми сайтындағы ақпаратқа сай, 50 жастағы бапкер Ұлыбританияда жұмыс істеуге рұқсат алуға байланысты 1 қарашада қызметіне кіріспек.

Бұған дейін АПЛ клубы Стивен Джеррардты қызметінен босатқан еді.

Эмери қазірде Ла-лиганың «Вильярреал» командасын 2020 жылдан бері басқарып келеді. Футбол маманы бұған дейін лондондық «Арсенал», «Пари Сен-Жермен», «Севилья», «Валенсия», «Альмерия» және мәскеудің «Спартак» клубтарын жаттықтырған. 

Ол бапкерлік мансабында төрт рет Еуропа лигасында жеңіске жеткен.

Дереккөзге сәйкес, Эмеридің жалақысы жылына 7 миллион еуроны құрайды. Бұл ретте оның қызметі аяқталып жатқан клуб «Вильярреал» маманның кеткені үшін 6 миллион еуро көлемінде өтемақы алады.