"Бизнес ниқоби" остида Ҳаж ва Умра зиёратига юборишда ноқонуний фаолият олиб бораётган фирибгарлар учрамоқда.

Сўнгги бир йил давомида Умра зиёрати тадбирларини ноқонуний амалга ошириш билан боғлиқ 178 жиноят иши қўзғатилган.  

Лицензиясиз фаолиятни амалга оширган 47, реклама тўғрисидаги қонун ҳужжатларини бузган 15 туристик ташкилотга жарималар қўлланилган.  

Шундай экан, Ҳажга, Умрага олиб борамиз, деган рекламаларнинг ҳаммасига ҳам ишониб бўлмайди. Чунки, айнан шундай рекламаларга алданиб, турли айланма йўллар орқали фуқароларни сарсон қилаётган фирибгарлар бор. Бундан эҳтиёт бўлиш керак.  

Эслатиб ўтамиз, Вазирлар Маҳкамасининг 2026 йил 24 январдаги  «Ҳаж» ва «Умра» тадбирларини ташкил этиш ва ўтказиш фаолияти такомиллаштирилиши муносабати билан Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида”ги қарори билан Ҳаж ва Умра зиёратига борувчиларнинг ягона портал орқали  рўйхатдан ўтиши мажбурий этиб белгиланди.

“Ҳаж ва Умра ягона портали”да муқаддас зиёратга бориш истагида бўлган фуқаролар учун ушбу портал орқали рўйхатдан ўтиш мажбурий этиб белгиланди.

Қарорга мувофиқ, янги тартиб "Ҳаж" тадбирига 2026 йил 1 февралдан бошлаб  кучга кирди. "Умра" тадбирига бориш учун порталда рўйхатдан ўтиш 1 майдан бошлаб мажбурий бўлади.  

Зиёратчилар ҳақидаги маълумотлар порталга киритилмасдан туриб сафарларни ташкил этишга йўл қўйилмайди.

Н.Абдураимова, ЎзА