Toshkent irrigatsiya va qishloq xo‘jaligini mexanizatsiyalash muhandislari institutida ijodkor-talabalarning “Ilhom buloqlari” she’riy to‘plami taqdimoti bo‘lib o‘tdi.

Tadbirda O‘zbekiston Yozuvchilar uyushmasi raisi Sirojiddin Sayyid ijodkor-talabalarni tabrikladi.

Shuningdek, so‘zga chiqqan institut ijodkor-talabalari o‘z ijodidan namunalar o‘qidi. Toshkent irrigatsiya va qishloq xo‘jaligini mexanizatsiyalash muhandislari instituti talabalari orasida ijodga, adabiyotga qiziquvchilar borligi va ularning orasidan professional ijodkorlar yetishib chiqayotganligi ham quvonarli.

Qayd etilganidek, “Ilhom buloqlari” she’riy to‘plamida Mustaqilligimizning 30 yilligi munosabati bilan 30 nafar ijodkor-talabalarning ijod mahsullari kiritilgan. 2023 yilda institutning 100 yillik yubileyi munosabati bilan 70 nafar talabalarning ijodiy namunalarini to‘plagan navbatdagi kitob chop etilishi rejalashtirilgan.

Tadbirda 8 nafar ijodkor-talabaga Abdulla Oripov nomidagi stipendiya guvohnomasi hamda O‘zbekiston Yozuvchilar uyushmasining sovg‘alari topshirildi.

Tadbir so‘ngida Abdulla Oripov haykali poyiga gullar qo‘yildi.

Muxlisa A’zamova,

O‘zbekiston davlat jahon tillari

universiteti talabasi

O‘zA