Грузиянинг Батуми шаҳрида 47 та мамлакатнинг 107 нафар энг кучли аёл гроссмейстерлари иштирокида ўтаётган FIDE жаҳон кубогининг 3-тур ўйинлари остонасига етиб келдик.
Кеча нуфузли мусобақанинг 2-тур тай-брек баҳсларида кутилган ва кутилмаган натижалар қайд этилди.
Ўзбекистон терма жамоаси аъзоси, иқтидорли шахматчимиз Гулруҳбегим Тоҳиржонова 2-босқичда Хитойнинг 6-рақамли шахматчиси ва амалдаги жаҳон чемпиони Лу Мяойига қарши фидокорона баҳс олиб борганини таъкидлаш лозим.
Стандарт йўналишидаги баҳснинг 1-партиясида Лу Мяойи, 2-партиясида Гулруҳбегим ғалабага эришган эди.
Кеча ўтган тай-брекнинг биринчи босқичида муроса йўли танланган бўлса, иккинчи тай-брек босқичида хитойлик шахматчи қизга омад кулиб боқди.
Шундай қилиб, Гулруҳбегим жаҳон кубогининг 2-босқичида курашни якунлади. Бироқ унинг ҳар бир юриши — юрт шаъни, ирода ва профессионаллик билан тўла эди. Бу иштирок таҳсинга лойиқ!
Европа чемпиони, польшалик Алина Калинскаяга қарши тай-брекда дона сурган ҳамюртимиз Умида Омонова рақибини 2:0 ҳисобида доғда қолдиргани турнирнинг энг шов-шувли натижаларидан бири бўлди.
У.Омонова 97 фоизлик устунликда дона суриши мутахассислар томонидан эътироф этилди ва у кейинги босқичларда рақибларига кучли рақобат таклиф этиши аниқ.
Турнирнинг 2-тур тай-брекида амалдаги FIDE жаҳон кубоги соҳибаси гроссмейстер Александра Горячкина қозоғистонлик Меруерт Камалидинова томонидан таслим этилди.
Бугун, 12 июль куни FIDE жаҳон кубоги 3-турининг 1-партиясида 32 нафар шахматчи рўбарў келади.
Ўзбекистон терма жамоаси аъзоси Умида Омонова мазкур босқичда қозоғистонлик 15 ёшли Элназ Калиахметга қарши дона суради.
Эслатиб ўтамиз, мукофот жамғармаси 676 минг 250 АҚШ долларидан иборат FIDE жаҳон кубогида ғолибликка эришган шахматчи 50 минг, 2-ўрин соҳиби 35 минг, 3-ўрин эгаси 25 минг АҚШ доллари билан тақдирланади.
Шунингдек, мусобақада тегишли турларда энг яхши натижага эришган иштирокчиларга ҳам белгиланган тартибда мукофот маблағлари топширилади.
FIDE жаҳон кубоги финал ўйинлари 26-28 июль кунлари ташкил этилади.
Тўлқин Рўзиев, ЎзА