Европа Комиссияси Ўрта ер денгизи минтақасига 42 миллиард евро ажратишни режалаштирмоқда. Бу маблағнинг бир қисми Европа Иттифоқида миграция сиёсатини қўллаб-қувватлашга йўналтирилади. Шунингдек, тузилма қўшни давлатларни ривожлантириш, қўллаб-қувватлаш учун 200 миллиард евро йщналтиради. Бу миқдор ЕИ бюджетидаги “ташқи харажат” бандида белгиланган. Мазкур молиявий режа 2028-2034 йилларни қамраб олади. ЕИ халқаро ҳамкорлик бўйича комиссари Юзеф Сикела мавзу юзасидан қуйидаги мазмунда баёнот берди:

– Биз иқлим беқарорлиги, глобал миграция босими, хом ашё учун рақобат кучайиши, глобал таъсир каби кучайиб бораётган муаммолар даврига яқинлашяпмиз.

Еврокомиссия раиси Урсула фон дер Ляйен жамоатчиликка тақдим этган ЕИ умумий бюджети режаси қарийб икки триллион евро қийматга тенг.

Брюссель гуманитар ёрдамга 25 миллиард, Иттифоқ кенгайиши ва қўшничилик сиёсати учун 42,6 миллиард евро таклиф қилмоқда. Олдинги йилларга нисбатан 37 фоиз оширилган молия миқдори аъзо мамлакатларда ислоҳотни жадаллаштиришга ёрдам бериши кутиляпти.

ЕИ таркиби масаласида Комиссар Марта Кос шундай дейди:

– Черногория, Албания, Молдова ва Украинани ЕИга қўшиш бўйича музокара жараёни жуда тез кечяпти. Авваллари бундай ҳолат кузатилмаган. Кимки Европа вақт ўтиши билан қўллаб-қувватлашни сусайтиради, деб ўйласа, адашади. Украинани ислоҳ қилиш ва қайта тиклаш учун 100 миллиард евролик алоҳида манба шакллантирилади. Биз ноқонуний миграцияга қарши курашда учинчи давлатлар билан ҳамкорликни ҳам кучайтирамиз.

Еврокомиссияси расмийлари айтишича, ноқонуний савдо ва миграцияга қарши самарали курашиш мақсадида хавфсизликка ҳамда чегара муҳофазасига кўпроқ сармоя киритилади. Шу билан бирга қонуний миграцияни ривожлантириш нияти ҳам бор. Масалан, 2024 йилга мўлжалланган “Миграция ва бошпана тўғрисидаги пакт” доирасида ЕИ Миср, Тунис ва Марокаш каби давлатлар билан “қулай ҳамкорлик” дастурини йўлга қўймоқчи.

<iframe width="560" height="315" src="https://www.youtube.com/embed/qUJUTsMRuBg?si=7ksOPg1ib_XIMdqM" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА