Африкаға украиндық астықтың алғашқы партиясын әкелген кеме Джибути портына келді.

BBC-дің хабарлауынша, Ливан туы бар MV Brave Commander кемесі Эфиопияға 23 000 тонна бидай тасымалдады.

Украинадан Джибути портына дейінгі жол екі аптаға созылды. Қазіргі кезде кемедегі бағалы жүкті түсіру жұмыстары басталып кетті – бұл операция үшін екі алып кран орнатылған.

Джибути - 900 мың халқы бар шағын мемлекет, бірақ ол континенттегі ең көп порттардың біріне ие.

Біріккен Ұлттар Ұйымының Дүниежүзілік Азық-түлік бағдарламасының (WFP) мәліметінше, бидайды қапқа салып, 20 миллион адам азық-түлік көмегіне мұқтаж Эфиопияға жүк көлігімен жеткізуге шамамен бір апта қажет.

Ұйым жол ақысын төлеген, себебі қақтығыстар мен құрғақшылық салдарынан босқындар мен қоныс аударған адамдарды қолдауға қажетті заттар азайған.