–Украина жанг майдони маълумотларини иттифоқчилар билан бўлишиш сиёсатини ишлаб чиқиш устида ишламоқда, – деди Украина рақамли трансформация вазири Михаил Федоров.

Унинг “Reuters” агентлигига берган интервьюсида айтишича, Киев ҳозирда бу маълумотларни баҳам кўришда “жуда эҳтиёткор”. Агентлик бундай маълумотлар сунъий интеллект моделларини тайёрлаш учун муҳим эканлигини таъкидлайди.

“Маълумотларга бўлган талаб ниҳоятда юқори, аммо ҳозир биз ушбу жараённи тўғри ташкил этиш сиёсатини ишлаб чиқмоқдамиз”, — дея қўшимча қилган вазир.

Бундан ташқари, “Reuters” Михаил Федоровга таяниб сўнгги пайтларда Украина халқаро мудофаа компаниялари томонидан ишлаб чиқарилган қуролларни синовдан ўтказиш учун мингга яқин ариза олгани ҳақида ҳам ёзмоқда. Федоровнинг таъкидлашича, ҳозирда мудофаа компанияларидан мингга яқин ариза келиб тушган ва “Украинага 50 хил технология юборилмоқда”, – дейилади агентлик ҳисоботида. 

Май ойи охирида шарҳловчи Рана Форооҳар “Financial Times” газетасида эълон қилган мақоласида Украина янги технологиялар учун синов майдони сифатида фойдаланилаётганини ёзган эди.

С.Раҳимов, ЎзА