Украина учун хавфсизлик кафолатлари бўйича АҚШ-Европа ҳужжатлари яқин кунларда Вашингтонда имзоланиши мумкин, деди Польша бош вазири Дональд Туск.

Маълумки, сешанба куни Парижда “хоҳловчилар коалицияси” деб номланган юқори даражадаги учрашув бўлиб ўтди. Унда Қўшма Штатлар президенти Дональд Трампнинг махсус вакили Стив Уиткофф ва Европанинг бир қанча нуфузли шахслари иштирок этди.

– Париждаги йиғиндан ҳеч қандай қарор кутмаслигимиз керак, -деди Туск. – АҚШ-Европа қўшма позициясини тасдиқловчи ҳужжатлар имзоланиши яқин кунларда, эҳтимол Вашингтонда бўлиб ўтиши мумкин. Бу масала ҳали ҳам очиқ қолмоқда.

Маълумот ўрнида: яқинда Владимир Зеленский Трамп билан учрашувидан сўнг АҚШ ва Украина ўртасидаги хавфсизлик кафолатлари 100 фоизга келишилганини таъкидлаганди.

С.Раҳимов, ЎзА