ВВС мухбири Жереми Боуэн Киевда Украина президенти Владимир Зеленский билан суҳбатлашди. Интервьюда Зеленский Украина урушда ютқазмаётганини ва аксинча, уни ғалаба билан якунлашини айтган. Мухбир шунингдек, Донбасс, Херсон ва Запорожье вилоятларининг айрим қисмларини Россияга бериш масаласида савол берган.

Зеленский бунга жавобан, буни фақат ҳудуд билан боғлиқ масаласи деб тушунмаслик керак, балки у ерда яшаб турган юз минглаб одамларни ташлаб кетиш дегани, ҳамдир. Бу жамиятни бўлишга олиб келади, деган у.  

Зеленскийнинг фикрича, ҳозирча Путинга фақат танаффус керак. Европалик  ҳамкорлар Россия 3–5 йилда қайта тикланиши мумкинлигини айтмоқда, аммо Украина президентининг фикрича, бу икки йилдан ошмайди. Шундан кейин у яна урушни давом эттириши мумкин.  

Киев марказидаги қўриқланадиган ҳукумат биноларидан бирида ёзиб олинган интервью давомида Зеленский асосан украин тилида гапирган. Россия аввал ҳам унга қарши суиқасд уюштиришга урингани сабабли хавфсизлик чоралари ҳар доимгидан кучайтирилган.  

Аввалроқ, АҚШ президенти Дональд Трамп Украина тезроқ музокара столига ўтириши кераклигини айтган эди. Трампнинг фикрича, Украина томони ҳудудий масалада ён бериши керак ва буни  ўт очишни тўхтатиш учун асосий шарт деб ҳисоблайди.  

Кўплаб таҳлилчилар Украина бу урушда ғалаба қозона олмайди, деб айтишган. Аммо, Зеленский бундай деб ўйламайди. У ғалаба деганда, одамларнинг ҳалок бўлишини тўхтатиш ва оддий ҳаётга қайтишни тушунишини айтган.  

Зеленский бир йил аввал Трамп ва унинг вице-президенти Жей Ди Вэнс билан Оқ уйда тортишиб кетган эди. Бу воқеа бутун дунё ОАВ орқали намойиш этилди. Журналист шу воқеаларга шаъма қилиб, Трампни ишончли шерик деб ҳисоблайсизми, деган саволига у шундай жавоб берган: гап фақат президент ҳақида эмас, балки хавфсизлик кафолатлари ҳақида кетмоқда, бу кафолатни эса АҚШ Конгресси тасдиқлаши керак, деган. Зеленский сайлов ўтказилиши мумкинлигини ҳам инкор этмади, аммо аввало бунинг учун хавфсизлик кафолатлари кераклигини таъкидлади. Миллионлаб украинлар чет элда, айрим ҳудудлар эса босиб олинган, бундай шароитда адолатли сайлов ўтказиш жуда қийинлигини айтган.  

Зеленский Ғарбдан янада кўпроқ ва сифатлироқ қурол сўрамоқда. Жумладан, у АҚШнинг Patriot ҳаво мудофаа тизимини лицензия асосида Украинада ишлаб чиқаришга рухсат сўрамоқда. Лекин, ҳозирча бунга жавоб олганича йўқ.  

Интервью сўнгида Зеленский уруш қанча вақт давом этиши мумкинлиги ҳақидаги саволга жавоб берди. У муддат ҳақида гапирмасдан, вазиятни кўп йўналишли “шахмат ўйини”га қиёс қилиб, асосий мақсад - Путинни тўхтатиш эканини айтди.

<iframe width="650" height="420" src="https://www.youtube.com/embed/ypGEZNJwdWE" title="Ukraina prezidenti BBCga intervyu berdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Искандар Исматов, ЎзА