Украина президенти Владимир Зеленский навбатдаги мураккаб дипломатик иш ҳафтасини Лондондан бошлади, деб хабар берди Евроньюс.

Нима учун мураккаб, чунки бундан олдин Украина ва АҚШ вакиллари билан ўтказилган тинчлик бўйича музокаралар кутилганидек натижа бермади. Бу тортишувлар Киeв учун вазиятни янада оғирлаштирди, дейиш мумкин.  

Лондондаги  саммитда эса Германия канцлери Фридрих Мерц эътиборда бўлди. У АҚШ тақдим этган тинчлик режасининг айрим бандларига шубҳа билан қараётганини яширмади. Бундан англаш мумкинки, Европада Москва ва Вашингтон ўртасидаги келишувлардан четда қолиш хавотири бор. Буни Мерцнинг гапларидан ҳам сезиш мумкин:  

- Германия, Европа сиёсатининг энг катта омили сифатида, жараёнларда фақат кузатувчи бўлиб қолишни истамайди. АҚШ таклиф қилаётган ҳужжатлардаги баъзи шубҳали жиҳатлар ҳақида гаплашиб олишимиз керак. Музокаралардаги энг муҳим жиҳат балки, шудир. Нима бўлган тақдирда ҳам биз Украинани қўллаб-қувватлаймиз, бунга ҳеч ким шубҳа қилмаслиги керак, -деган у.  

Франция президенти Эммануэль Макрон ҳам Европанинг бу жараёндаги ўрнини эътиборга олиб, Украина, Европа ва АҚШ позицияларида ўзаро муштараклик етишмаётганини билдирган. Унинг фикрига кўра, музокараларни умумий хавфсизлик учун ишлайдиган нуқтада бирлаштириш керак.    

Зеленский эса, Европа билан ҳам, АҚШ билан ҳам тил топишишга мажбур эканини очиқ айтиб ўтди. Унинг фикрича, Украина кучли иттифоқсиз хавфсизлик кафолатларини ярата олмайди.  

Саммит давомида Британия бош вазири Кир Стармер Европа мамлакатлари Украина хавфсизлиги бўйича масъулиятни зиммаларига олишга тайёр эканини билдирди. Европада Украинани қўллаб-қувватлаш ҳақида гап кетаётганда, АҚШдаги вазиятни яхши деб бўлмайди. Президент Дональд Трамп якшанба куни журналистлар билан учрашганда Зеленскийни таклифни ўқимаганликда айблади. Шу сабаб, уни имзо чекишга тайёр эмас, деган. Бу эса Вашингтоннинг Украина бўйича ёндашуви ҳар қандай вазиятда кескин ўзгариши мумкинлигини англатади. Юз бераётган воқеалар Киевни Европа билан янада фаол дипломатияга ундамоқда, дейиш мумкин. Зеленский Лондондан кейин Брюссельга йўл олди. У ерда НАТО раҳбарияти билан учрашувлар кутилаяпти. Кейин эса Римда Италия бош вазири Жоржия Мелони билан музокаралар олиб боради. Президентнинг бу сафарлари Украина учун янги ҳарбий ёрдам ва энг муҳими, Европа ва АҚШ ўртасида олтин ўрталиқни топишга қаратилган, деса бўлади.  

Хуллас, Лондон саммити шуни кўрсатдики, Украина атрофидаги дипломатия янги босқичга чиқди. АҚШда сиёсий қарашлар ўзгараётган бир пайтда, Европа ўз позициясини қатъийлаштираяпти. Чунки, томонларнинг мақсадлари ойдинлаша бошлади. Бундай жараёнда Зеленский ҳаракати Украина келажаги учун ҳал қилувчи аҳамият касб этиши мумкин.

<iframe width="650" height="420" src="https://www.youtube.com/embed/HMiifBwUY9g" title="Ukraina masalasida Yevropa va AQSH pozitsiyalari mos kelmayapti" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов,ЎзА