АҚШ Президенти Дональд Трампнинг фикрича, Украина Донбассни Россияга бериши, Запорожье ва Херсон вилоятларидаги фронт чизиғини музлатиши керак. Бунинг эвазига Киев АҚШ ва Европадан хавфсизлик кафолатини олади. Шунингдек, Украина шарқий ҳудудларини Россияга топшириши, Қуролли кучлари сонини қисқартириши ва айрим турдаги қуроллардан воз кечиши ҳам таклиф қилиняпти. Айни талаблар Трамп маъмуриятининг Россия – Украина урушини тугатишга оид янги режасида белгиланган. Бу ҳақда кеча қатор ғарб оммавий ахборот воситалари, масалан “Reuters” агентлиги ва “Axios” ўз манбаларига таяниб хабар тарқатди.
Суҳбатдошлар айтишича, Оқ уй Украина Президенти Володимир Зеленскийга АҚШ ишлаб чиққан 28 бандли режани қабул қилиши кераклигини маълум қилган.
Олдинроқ Трамп маъмурияти лойиҳада тўрт асосий йўналиш кўрсатилганини билдирган эди: Украинада тинчлик ва хавфсизлик кафолати, Европада хавфсизлик ва Вашингтоннинг Москва ҳамда Киев билан келгуси муносабати.
Янги режага кўра, Киев тахминан 14,5 фоизини назорат қилаётган минтақани Россияга бериши кўзда тутилган. Энди АҚШ ва Европа Киев учун хавфсизликни кафолатлар экан.
Оқ уй “Агар уруш давом этса, Украина барибир бу ҳудудларни йўқотади, шунинг учун келишувни ҳозир имзолаган маъқул” деяпти.
Шунингдек, ҳужжат Херсон ва Запорожье вилоятларидаги фронт чизиғи музлатилиши, Украина Қуролли кучлари сони икки баробар қисқартирилиши, Киевнинг Россия ҳудудига чуқур зарба бера оладиган узоқ масофали қуроллардан фойдаланиши чекланишини ҳам талаб этади.
“Axios” портали маълум қилишича, АҚШ Россия – Украина урушини тугатишга доир янги режа бўйича рус ҳукумати вакиллари билан яширинча музокара олиб бормоқда. Тегишли лойиҳалар устида Америка Президентининг махсус вакили Стивен Уиткофф ишлаяпти. Режа мазмуни РФ раҳбарининг махсус вакили Кирилл Дмитриев билан муҳокама қилинмоқда.
<iframe width="650" height="420" src="https://www.youtube.com/embed/958O4JFUtM0" title="Ukraina hududlaridan voz kechadimi?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Искандар Исматов, ЎзА