Абу-Дабида Россия – Украина урушини якунлаш бўйича уч томонлама музокараларнинг биринчи куни тугади. Музокаралар бугун ҳам давом этади. Тадбир ёпиқ форматда ўтмоқда, деб хабар берди DW агентлиги.

Россия делегациясига адмирал Игорь Костюков бошчилик қилмоқда. Украина делегациясига Миллий хавфсизлик ва мудофаа кенгаши котиби Рустем Умеров раҳбарлик қиляпти. АҚШ томонидан эса музокараларда президентнинг махсус вакили Стив Уиткофф, Дональд Трампнинг куёви Жаред Кушнер ва АҚШ армияси вакили Дэниел Дрисколл иштирок этмоқда.

Politico нашрининг хабарига кўра, музокаралардаги асосий мавзу - ҳудудий масала бўлиб қолмоқда. Музокараларда томонлар бир қатор масалалар бўйича келишиб олган, аммо ҳудудлар масаласида якдил қарорга кела олмаган. Биринчи босқичдан сўнг АҚШ давлат котиби Марко Рубио Донбасс масаласи ҳали ҳам ҳал қилинмаган ягона масала эканини тасдиқлади.  

Россия Украина қўшинларини Донбассдан олиб чиқишни талаб қилмоқда, Киев эса бу талабни рад этяпти. Донбасс Украина ҳудудининг бир қисми ҳисобланади, аммо ҳозирда унинг айрим ҳудудлари Россия қўшинлари назорати остида. Аввалроқ, Украина президенти Владимир Зеленский ҳудудлар масаласи фақат Россия президенти Владимир Путин билан шахсий учрашувда ҳал қилиниши мумкинлигини айтган эди.      

<iframe width="484" height="860" src="https://www.youtube.com/embed/ZUZRkvLRyJs" title="Ukraina bo‘yicha muzokaralarning birinchi kuni yakunlandi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>           

Кенжа Бекжонов, Анвархўжа Аҳмедов (видео), ЎзА