AQSH Prezidentining maxsus vakili Stiven Uitkoff hamda Donald Trampning kuyovi Jared Kushner ertaga Moskvada Rossiya Prezidenti Vladimir Putin bilan uchrashadi. “Reuters” yozishicha, Uitkoff CNBC telekanaliga bergan intervyusida shu haqda ma’lum qilgan.

Uning so‘zlariga ko‘ra, uchrashuv Rossiya tomoni tashabbusi bilan tashkil etilmoqda.

– Biz payshanba kuni Putin bilan muloqot qilamiz, – degan AQSH vakili. – Uchrashuvni RF tomoni so‘radi. O‘ylaymanki, ular muhim bayonot beradi.

Maxsus vakil Moskvaga yo‘l olishidan oldin, 21 yanvar kuni Ukraina tomoni bilan ham uchrashuv o‘tkazishini bildirgan.

Mazkur ma’lumotni Rossiya Prezidenti matbuot kotibi Dmitriy Peskov ham tasdiqladi. U RBK nashri muxbiriga mavzuni izohlarkan, yetakchining ish jadvalida mazkur uchrashuv rejalashtirilganini aytgan.

D.Hakimov, O‘zA