АҚШнинг НАТОдаги элчиси Мэттью Уитакер Хитой Россиянинг Украинадаги ҳарбий амалиётини қатъий қўллаб-қувватлаётгани, Пекин Москвага бир “телефон қўнғироғи” билан урушни тўхтата олишини айтди.

Мулозим ХХР РФга икки мақсадда фойдаланса бўладиган технология сотиш, шунингдек Россия нефти ва гази харидини тўхтатиши мумкинлигини ҳам таъкидлаган. Бу рус иқтисодиётини сезиларли даражада заифлаштиради ва халқаро босимни мувозанатга келтиради.

"Блумберг" маълумотига кўра,  Хитой ва Россия ҳамкорлиги кенг кўламли уруш бошлангандан кейин янада  кучайди, ХХР санкцияга қарамай, РФ нефтининг энг йирик харидорига айланди. 2024 йил январь ойида Пекин кунига 1,65 миллион баррель нефть импорт қилди. Шу тариқа Россия Украинага бостириб киргандан бери иккинчи энг юқори кўрсаткич қайд этилди. Бундан ташқари, Пекин Москвага ҳарбий технология, жумладан Украинага қарши зарбада ишлатиладиган дрон билан ёрдам беришда давом этяпти. Можарони ҳал қилишда муҳим ўрин эгаллашга тайёрлигини эълон қилганига қарамай, Хитой амалда Россияни қўллаб-қувватлашда давом этмоқда. Бу уруш тугашини қийинлаштирмоқда.

С.Раҳимов, ЎзА