Жорий йилда UI GreenMetric 2025 натижалари дунё бўйлаб олий таълим муассасаларининг барқарор ривожланиш тамойилларига қай даражада амал қилаётганини яна бир бор намоён этди. Мазкур рейтинг бугун экологик сиёсат, ресурслардан самарали фойдаланиш, “яшил” инфратузилма ва экологик онгни тарғиб этиш борасида энг ишончли ва нуфузли мезонлардан бири ҳисобланади.

Бу йилги баҳолаш жараёнида 105 давлатдан 1 минг 745 та университет иштирок этди. Улар орасида Ўзбекистон таълим муассасалари ўзининг фаол ва сезиларли иштироки билан эътиборни тортди.

ТОП-1000 таликдаги ўринлар сонининг сезиларли ошиши экологик бошқарув, энергия самарадорлиги, чиқиндиларни қайта ишлаш, сув ресурсларини бошқариш, “яшил” инфратузилма каби соҳаларда реал натижаларга эришилаётганидан далолат беради.

Ўзбекистон олийгоҳларида сўнгги йилларда “яшил кампус” тамойиллари кенг жорий қилина бошлади. Бу жараён фақатгина экологик лойиҳалар билан чекланмай, университетларнинг кундалик бошқарув тизимини ҳам ўзгартирмоқда.  

UI GreenMetric рейтинги нафақат университетларнинг экологик фаолиятини баҳолайди, балки уларнинг халқаро майдондаги кўриниши, ҳамкорликлар имкониятини кучайтиради.  

UI GreenMetric 2025 рейтингидаги натижалар шуни кўрсатадики, Ўзбекистон олий таълим тизими энди экологик барқарорликни қўшимча вазифа сифатида эмас, балки стратегик устувор йўналиш сифатида қабул қилмоқда.  

38 та олийгоҳнинг ТОП-1000 таликдан жой олиши бу борада юртимизда амалга оширилаётган кенг кўламли ислоҳотларнинг самараси бўлиб, ҳар бир университетнинг экологик масъулиятга таянган фаолияти халқаро миқёсда муносиб эътироф этилмоқда.

Келгуси йилларда олийгоҳлар ўртасида ушбу рейтинг бўйича рақобат янада кучайиши, кампусларнинг янада яшиллашуви ва ўқув жараёни экологик тамойилларга интеграцияси чуқурлашиши кутилмоқда.

Дилдора ДЎСМАТОВА, ЎзА