Угандада президентликка номзод ва хонанда Роберт Кьягулани ҳибсга олинишига қарши норозилик намойишларида ҳалок бўлганлар сони камида 30 кишига етди, деб хабар бермоқда маҳаллий полиция.

Бундан аввалроқ оммавий норозилик чиқишлар пайтида 16 киши қурбон бўлгани ва 65 киши жароҳат олгани айтилган эди. Тартиб посбонлари яна 350 кишини ҳибсга олган.

"Маълум қиламизки, 2020 йил 18 ноябрда кескин кечган сиёсий намойишлар натижасида мамлакатнинг кўплаб ҳудудларида камида 28 киши қурбон бўлган", - дея баёнот берди  Уганда полицияси вакили Фред Энанга.

2021 йилда бўлиб ўтадиган сайлов арафасида Кьягулани хавфсизлик хизмати ходимлари билан муштлашув уюштирган тарафдорлари қаршисида чиқиш қилишга уринган. Шундан кейин мухолифатчи ҳибсга олинган. Хабарда у митингда 200 дан зиёд киши тўплагани учун хибсга олингани айтилмоқда. Пандемия даврида  200 дан ортиқ кишининг бир жойга тўпланиши мумкин эмас.

Кьягулани мамлакатда машҳур хонанда бўлган. У 2017 йил апрелда парламентга депутат бўлди ва сиёсат билан шуғулланишни бошлади. Кьягулани мамлакат президенти Йовери Мусевенини муросасиз танқид қилиб келади. Ҳукумат мухолифатчини аввал ҳам бир неча бор ҳибсга олган эди.

Амалдаги президент 76 ёшли Мусевени 1986 йилдан буён Угандага раҳбарлик қилиб келади.  

2021 йил январда мамлакатда янги президент сайлови бўлиб ўтади. Айни пайтда Мусевени олтинчи бор президентликка   сайланиш умидида сайловолди кампаниясини фаол олиб бормоқда.