Францияда ўтаётган Паралимпия ўйинларининг дзюдо бўйича эркаклар ўртасида J2 классида -73 кг вазн тоифасида баҳс олиб борган вакилимиз Учқун Қуронбоев бронза медалини қўлга киритди.

Полвонимиз ушбу медаль учун кечган беллашувда Ким Донгунга қарши татамига чиқди ва ғалабага эришиб, делегациямиз ҳисобига навбатдаги бронза медални қўшиб қўйди.

Маълумот ўрнида: Ўзбекистон делегацияси ёзги Паралимпия ўйинларида медаллар сифати бўйича ўз тарихидаги энг яхши натижасини янгилади.

Ўзбекистон делегацияси айни пайтда 9 та олтин, 7 та кумуш ва 6 та бронза медаль билан ўз тарихидаги энг яхши натижани янгилаб улгурди.

Пара енгил атлетика, пара дзюдо, пара пауэрлифтинг ва пара каноэ бўйича спортчиларимизнинг иштироки давом этади.  

Жавоҳир Тошхўжаев,

ЎзА