Барча ҳудудларда бўлгани каби Учқудуқ туманида ҳам “Аёллар дафтари” шакллантирилган бўлиб, унга 188 нафар ижтимоий, ҳуқуқий, психологик қўллаб-қувватлашга, билим ва касб ўрганишга эҳтиёжи ва иштиёқи бор бўлган хотин-қизлар киритилган.

Ҳозирда улар билан тизимли ва манзилли ишлар олиб борилиб, 138 нафар иш излаётган аёлнинг 37 нафари доимий иш билан таъминланди, 2 нафар касб-ҳунар эгаллаш истагида бўлган хотин-қиз пазандалик, тикувчилик йўналишида ўқитилди. Ўзбекистон Республикаси Вазирлар Маҳкамасининг 2021 йил 8 январдаги “Хотин-қизларни ижтимоий қўллаб-қувватлаш бўйича қўшимча чора-тадбирлар тўғрисида”ги қарорига асосан, 19 нафар боқувчисини йўқотган, 7 нафар иккинчи гуруҳ ногиронлиги бўлган аёлга 25 миллион 480 минг сўм миқдорида моддий кўмак берилди.

– “Аёллар дафтари”га киритилган 13 нафар тиббий кўмакка муҳтож аёлнинг 10 нафари чуқурлаштирилган тиббий кўрикдан ўтказилди, – дейди Учқудуқ туман ҳокими ўринбосари – туман Маҳалла ва оилани қўллаб-қувватлаш бўлими бошлиғи Улуғбек Тўраев.

 – Уларга туман тиббиёт бирлашмаси шифокорлари томонидан тиббий-ижтимоий ёрдам кўрсатилди. Яна 4 нафар психологик кўмакка муҳтож аёл билан якка тартибда суҳбатлар ўтказилди. Бундан ташқари, “Аёллар дафтари”га киритилмаган хотин-қизлар ҳам эътибордан четда қолаётгани йўқ. Ана шундай опа-сингилларнинг 23 нафари ўз ишини йўлга қўйиш истагини билдирган. Уларнинг 10 нафарига имтиёзли кредитлар берилиб, якка тадбиркор сифатида рўйхатдан ўтказилди.

Шунингдек, “Соғдиёна” ННТ, “Ҳунармандлар” уюшмаси туман бўлими ва вилоят “Тадбиркор аёл” маркази томонидан 400 нафар учқудуқлик аёл сартарошлик, тикувчилик ва пазандачилик йўналишларида касб-ҳунарга ўқитилди.

Абдували Бўриев, ЎзА