Наманганда Халқаро теннис федерацияси томонидан ўтказилаётган ўсмирлар ўртасидаги J30 таснифига кирувчи турнирда теннисчиларимиз муваффақиятли иштирок этмоқда.

Мусобақанинг яккалик баҳсларида Маҳмудбек Бекназаров ярим финалда нейтрал теннисчи Клим Касинцевни 6:2, 6:0 ҳисобида енгди ва сўнгги ҳал қилувчи финал ўйинида германиялик Вигго Вагенкнехтга қарши кортга чиқадиган бўлди. 

Жуфтликлар ўртасида эса Маҳмудбек Бекназаров ва Абдураҳмон Каримов дуэти бош соврин учун ўтадиган финал учрашувида ҳамюртимиз Амир Сафоев ва нейтрал теннисчи Тимур Даутов тандеми билан ўзаро рақобатлашиш ҳуқуқини қўлга киритди. 

Қизлар ўртасидаги жуфтлик беллашувларида Шаҳодат Ортиқбоева қозоғистонлик Линара Булешева билан дуэт ҳосил қилиб, финал йўлланмасига эга бўлди. Энди улар бош соврин учун қозоғистонлик Кира Эртман ва нейтрал теннисчи Александра Качушкина тўсиғидан ўтиши керак. 

Жавоҳир Тошхўжаев, ЎзА