14 ёшлилар мусобақасининг иккинчи тур ўйинлари бўлиб ўтди. Майдон ва иқлимга тобора мослашиб бораётган ёш футболчиларнинг бу галги хатти-ҳаракатлари аввалгисиданда тезкор, шиддаткор, ғалабага бўлган иштиёқлари билан кучлироқ бўлганлиги сезилиб турди.

Ўтказилган тўққизта учрашувдан («Арал Самали» жамоаси турнирга етиб келмаган) бирортасида ҳам дуранг қайд этилмади. Ўйинларнинг тенг ярмидан кўпроғида йирик натижалар кузатилди.

Андижонликларнинг «Сўғдиёна» устидан эришган 9:0 ҳисобидаги ғалаба ҳозирча мусобақанинг энг йирик натижаси бўлиб турибди.

Иккинчи турдан кейин «Насаф», «Пахтакор», «Хоразм» ва «Навбаҳор» жамоалари ўз гуруҳларида юз фоизли натижа билан пешқадамлик қиляпти. Навбатдаги босқичга кимнинг чиқиш-чиқмаслик масаласи фақат учинчи турда ҳал бўлади.

Турнир давомида эсда қоладиган воқеалардан бири «Локомотив» – «Одил Жуниор» учрашувининг энг яхши ўйинчиси Қувончбек Абраевга («Локомотив») махсус совринни футболимиз юлдузи Одил Аҳмедовнинг ўзи топширди.

«Бунёдкор» – «Хоразм» жамоалари ўйинида «ёш қалдирғочлар» дарвозасига тўп киритган «Хоразм» ҳужумчиси Асад Ражаббоев ушбу голини онасининг туғилган кунига бағишлаганлигини ўзига хос қилиқлари билан намойиш этди...

Мусобақанинг учинчи тури эртага давом этади.

Ойбек Юнусов, ЎзА