Тәжікстанда ұлттық валюта сомони айналымға енгізілгенінің 25 жылдығына орай жаңа 100 сомонилік естелік банкноталар айналымға шығарылды.

Тәжікстан Ұлттық банкінің хабарлауынша, естелік банкноталар Тәжікстан Республикасының «Тәжікстан Ұлттық банкі туралы» заңы мен Ұлттық банк басқармасының шешіміне сәйкес, экономиканы қолма-қол ақшамен қамтамасыз ету мақсатында осы жылдың 30 қазанынан бастап айналымға енгізілген.

Жаңа банкнота тек тарихи естеліктің нышаны ғана емес, сонымен бірге елдің тұрақты қаржы-несие жүйесі мен ұлттық экономикасының дамуының көрінісі. Оның дизайнында Тәжікстанның көне өркениетін және халықтың жасампаздық шеберлігін бейнелейтін мәдени, тарихи және сәулеттік элементтер тоғысқан.

Естелік банкноталар Тәжікстан Ұлттық банкінің өзге де 100 сомонилік купюраларымен тең дәрежеде айналымда қолданылады.