Бугунги кунда олий таълим тизимида тюторларнинг ҳам роли муҳим аҳамият касб этмоқда. Талабалар билан яқиндан ишлаш, улар дуч келиши мумкин бўлган муаммоларга тўғри ечим топиш, илмга йўналтириш ва маънавий-маърифий фаоллигини ошириш каби энг муҳим, айни дамда мураккаб жараёнлар тюторлар зиммасига юкланган.

Албатта, бунда улардан тинимсиз меҳнат, улкан тажриба ва малака талаб этилади. Шунинг учун ҳам улар учун доимий малака ошириш курслари ташкил қилиб келинмоқда.

Талаба ва ўқувчиларнинг ижтимоий фаоллигини ошириш марказида олий таълим муассасаларида фаолият юритаётган тюторлар учун янги ўқув гуруҳлари ўз фаолиятини бошлади. Ушбу курслардан кўзланган мақсад тюторларнинг касбий компетенцияларини ривожлантириш, замонавий таълим тенденциялари ва илғор педагогик тажрибаларни ўзлаштиришдан иборат.

Янги мавсумда 576 нафар тюторнинг малакасини ошириш режалаштирилган. Бу орқали республика бўйлаб уларнинг касбий салоҳиятини ошириш ва таълим жараёнидаги фаоллигини кучайтириш мақсад қилинган.

Таъкидлаш жоизки, ўқув машғулотларини олиб бориш учун соҳада катта тажрибага эга профессор-ўқитувчилар жалб этилган. Дарслар жараёнида тюторларга назарий билимлар билан бир қаторда амалий кейслар, халқаро тажриба ва янги педагогик ёндашувлар тақдим этилиши кўзда тутилган. Малака ошириш курслари онлайн ва офлайн шаклларда ташкил этилади.

Бундан кўриниб турибдики, талаба-ёшларнинг келажагига масъул бўлган тюторлар учун ҳам ушбу курслар катта аҳамиятга эга. Бу каби амалга оширилаётган ислоҳотлар янги ренессанс босқичига нарвон вазифасини ўтаса ажабмас. Зеро, юксак марраларга дадил ва тўғри қадамлар элтади.

Шербек Исломов, ЎзА