“Туркманбоши” портида ўн кун қолиб кетган қишлоқ хўжалиги техникалари Тошкент вилоятига келтирилди
Туркиянинг “Agros Makina” ва “Atespar” (Agromaster) компанияларида қишлоқ хўжалиги техникалари, жумладан, чигит экиш сеялкалари ҳам ишлаб чиқарилади.
Туркиянинг “Agros Makina” ва “Atespar” (Agromaster) компанияларида қишлоқ хўжалиги техникалари, жумладан, чигит экиш сеялкалари ҳам ишлаб чиқарилади.
Бундай техника воситалари сифатлилиги, деҳқонларга қулайлиги ва жаҳон андозалари талабларига жавоб бериши билан ажралиб туради. Бугунги кунда мазкур ихчам ва замонавий техникалардан кўплаб пахта етиштирилаётган давлатларда фойдаланилмоқда.
Мамлакатимиз пахтакорлари ҳам мазкур сеялкаларни ишлатиб келишади. Улар деҳқонларимизга ҳар томонлама маъқул бўлаётганлиги боис, эҳтиёж ортиб бормоқда.
Тошкент вилоятининг Чиноз туманида рўйхатдан ўтган “APK Chinoz” унитар корхонаси томонидан туманда агро кластер ташкил этилган эди.
Агрокластер ва Туркиянинг “Agros Makina” ҳамда “Atespar” (Agromaster) компаниялари билан умумий қиймати 320 минг доллар бўлган 30 дона ана шундай қишлоқ хўжалиги техникалари (сеялка)ни жорий йилнинг апрель ойида етказиб бериш тўғрисида шартнома имзоланганди. Лекин бутун дунёда коронавирус пандемияси сабабли карантин жорий этилганлиги боис, техника воситалари Туркманистоннинг “Туркманбоши” портида 10 кундан ортиқ вақт давомида қолиб кетди.
Тошкент вилояти ҳокимлиги ахборот хизматининг маълум қилишича, Ўзбекистон ва Туркманистон давлатлари ҳукуматлари, шунингдек, Тошкент вилояти ҳокимининг инвестициялар масалалари бўйича ўринбосари Жамшид Абдусаломовнинг бевосита саъй-ҳаракатлари туфайли қишлоқ хўжалик техникалари юкланган 3 та транспорт (фура) воситаси юртимизга келтирилди.
Бугунги кунда ушбу қишлоқ хўжалиги техникаларидан Тошкент вилоятида чигит экиш мавсумида тўла қувватларда фойдаланилмоқда.