Фарғона вилояти делегацияси жорий йилнинг февраль ойи охирида Туркияда бўлиб, бир қатор келишувларга эришди. Бугунги кунда амалий ишлар босқичига ўтилмоқда.

Вилоят ҳокими Хайрулло Бозоров туркиялик инвесторлар гуруҳини қабул қилди. “Қўқон” эркин иқтисодий зонаси ҳудудида қиймати 20 миллион доллардан зиёд тикув-трикотаж мажмуаси барпо этиш лойиҳасига киришган Жем Ишери билан бирга текстиль бўёқлари кимёвий компонентлари ишлаб чиқарувчи Doğankent компанияси раҳбари Аҳмет Четинкая ҳамда инвестор Мехмет Зерей билан мулоқотда Фарғона вилоятида текстиль бўёғи кимёвий компонентлари ишлаб чиқариш лойиҳаси муҳокама қилинди. 

Мулоқот давомида туркиялик ишбилармонлар томонидан Ўзбекистоннинг, хусусан, Фарғона вилоятининг Туркияда ўсиб бораётган инвестицион жозибадорлиги ҳамда вилоятнинг текстиль соҳасидаги мавжуд катта салоҳияти алоҳида қайд этилди.

Туркиялик инвесторлар лойиҳа қиймати биринчи босқичда 5 миллион долларни, тўла амалга оширилганда 20 миллион долларни ташкил этадиган ушбу ишлаб чиқариш корхонасини “Қўқон” ЭИЗ ҳудудида барпо этишни режалаштиришган. Аҳмет Четинкая вилоят раҳбарига бу корхона учун ускуналар Туркияда тайёр эканини, корхона қуриб битказиш бир йилга яқин вақт олишини, бу даврга қадар вилоятда бўш турган ва фаолият кўрсатмаётган бино-иншоотлардан тасдиқланган ижара ставкаси асосида белгиланган тартибда жой ажратиб берилса, бир ой ичида ишлаб чиқаришни йўлга қўйишга тайёр эканини маълум қилди. Ташкил этиладиган корхонанинг чиқиндисиз ишлаб чиқариш технологиялари билан тўла таъминланиши билдирилди.

Корхона фаолиятини йўлга қўйиш учун вилоят ҳудудида давлат мулки бўлган бўш турган ва фаолият кўрсатмаётган бинолардан ишлаб чиқариш учун етарли майдонга эга бўлган вариантлар туркиялик инвесторларга тақдим этилди. Уларнинг танлови асосида кейинги босқичда ижара шартномаси асосида жой ажратиб берилишига келишилди.
 

М. Сулаймонов, ЎзА