Туркияда тўрт нафар россиялик, бир украиналик ва бир ўзбекистонлик фуқаро ҳарбий ва сиёсий жосусликда ҳамда чечин мухолифатчиларига ҳужум уюштиришга тайёргарлик кўрганликда айбланиб ҳибсга олинди, деб ёзмоқда Hurriyet газетаси. Бу ҳақда РИА Новости маълум қилди.

Хабарда айтилишича, газета ҳибсга олинганларнинг исми-шарифларини ҳам келтирган, улар: россиялик Абдулла Абдуллаев, Равшан Аҳмедов, Беслан Расаев ва Асланбек Абдулмуслимов, Украина фуқароси Игорь Ефрим ва Ўзбекистон фуқароси Амир Юсупов. Энди уларга нисбатан 15 дан 20 йилгача қамоқ жазоси қўлланиши мумкин.

Бундан аввалроқ агентлик Туркияда олти киши хорижликларга ҳужум уюштиришга тайёргарлик кўриш ва жосуслик қилишда айбланиб қўлга олингани ҳақда хабар тарқатган эди. Уларнинг барчаси чечинистонлик экани айтилганди.

Кейинроқ Россия президенти матбуот котиби Дмитрий Песков Кремль Туркияда россияликлар қўлга олингани ҳақда маълумотга эга эмаслигини маълум қилганди.