Мамлакатимизда сўнги йилларда энг катта эътиборга сазовор бўлиб келаётган йўналишлардан бири илмий фаолиятдир. Бугун тарих фани ўқитилиши истиқболига эҳтиёж ортмоқда. Туркияда Ўзбекистон Фанлар академияси Тарих институти ходимларининг ўқув йиғилиши ташкил этилди.

Ўқув ойи Турк ҳамкорлик ва мувофиқлаштириш агентлиги (ТИКА), Нажмиддин Эрбақон университети, Турк тарихи қуруми ва ИРCИКА ташкилоти билан ҳамкорликда ўтказилмоқда. Унда Тарих институтининг ўн бешга яқин ёш тарихчи олимлари қатнашди.

Дастурга мувофиқ Кўния шаҳридаги Нажмиддин Эрбақон университети бош биносида кутиб олиш жараёни бўлиб ўтди. Шундан сўнг Мавлоно Румий шаҳрининг тарихий ерлари билан танишилди.

Илмий сафарнинг иккинчи куни Нажмиддин Эрбақон университетида ёзги ўқишларнинг очилиши, туркиялик олимларнинг илмий чиқишлари бўлиб ўтди. Илмий йиғинни Тарих факультети декани профессор Камол Ўзжан олиб борди. Ҳар икки давлат тарихчи олимлари учун ташкил қилинган йиғиннинг қанчалик муҳимлиги ва келажакда бунинг кўламини кенгайтириш кераклиги ҳақида фикрлар билдирилди.

Университет раҳбари профессор Закириян жаноблари табрик сўзида ҳамкорликни янада мустаҳкамлаш ва ривожлантириш учун университет ҳар доим тайёрлигини, илмий мулоқотлар алмашинувини мунтазам йўлга қўйиш учун барча шароитлар етарлилигини эътироф этди.

Шунингдек, охирги 5-6 йил давомида давлатлараро муносабатларнинг янада мустаҳкамланиб бораётгани, Туркия жумҳурияти раҳбари Ражаб Таййиб Эрдўғон жанобларининг мамлакатимизнинг Хива шаҳрига қилган расмий ташрифи вақтида тарихи бир бу элнинг муштарак йўллари, ўзаро ҳамкорликни янги босқичга олиб чиқиш лозимлиги ҳақида айтган фикрларини таъкидлаб ўтди.

Тарих институти директори профессор Азамат Зиё табрик сўзида тили ва дини бир бу элларни тарихан манзиллари бирлиги, муштараклиги ҳақида айтиб, 140 йил олдин Туркистон халқини бир-биридан сунъий ажратиш ҳолатлари бўлганлиги, айниқса 1924 йилда этник жиҳатдан бир-биридан ажратиб бошқарилганлиги ҳақида айтиб ўтди.

Туркия жумҳурияти Ўзбекистон Республикаси мустақиллигини илк тан олган давлат сифатида, айниқса 2016 йилдан сўнг Янги Ўзбекистон раҳбарининг ўзаро алоқаларни янги босқичга олиб чиққанлигини олимларнинг бугунги илмий ҳамкорлик учун ташрифи мисолида эътироф этди.

Сўнг Тарих институтида охирги икки йилда нашр қилинган барча илмий китоб ва журналлар, эсдалик совғалари топширилди.

Салжуқ университети профессори Мустафо Демирчи ўз илмий маърузасида «Ўзбекистон – анадулиликлар учун иккинчи қибладир», дея ифтихор билан айтди. Ўзбекистон барча туркий халқларнинг сиёсий, маънавий жиҳатдан тарихий маркази бўлгани ва Янги Ўзбекистонда учинчи уйғониш даврининг илк пойдевори қўйилаётгани ҳақида ишончли фикрлар билдирди.

Нажмиддин Эрбақон университети профессори Фотиҳ Меҳмид Берк жаноблари эса «Анадули маданият тарихи» хусусида илмий қарашларини баён этди.

Умуман олганда, маърузалар бир-биридан қизиқарли ва фойдали мавзуларни қамраб олди.

ЎзА