Turkiya shimoli-g‘arbida o‘rmon yong‘ini 11 soatdan buyon davom etmoqda, mingdan ziyod kishi xavfsiz joyga o‘tkazildi, deb xabar tarqatdi “Milliyet” gazetasi.

– Chanoqqal’a viloyatida yuz bergan ushbu yirik ofatni nazorat qilish juda qiyin kechyapti, – dedi qishloq va o‘rmon xo‘jaligi vaziri Ibrohim Yumoqli. – Shu bois hukumat voqeaning salbiy rivojiga tayyorgarlik ko‘ra boshlagan. Tabiiy ofatni bartaraf qilishga 8 samolyot, 26 vertolyot, 180 ga yaqin maxsus texnika vositasi jalb qilingan.

Aniqlik kiritilishicha, ehtiyotkorlik nuqtai nazaridan 1104 kishi xavfsiz hududga ko‘chirilgan.